Қўл бериб, қучоқлашиб, ўпишиб ёки калла уриштириб кўришиш аслида турмушимизга ўзга халқлар маданияти орқали сингиб кирган. Бизда қадимда бундай саломлашиш одат бўлмаган. Азалдан ота-боболаримиз ва момо-бувиларимиз қўлини кўксига қўйиб саломлашишган. Бу ҳақда Ўзбекистон Нодавлат нотижорат ташкилотлари Миллий ассоциацияси Кенгаши раиси Насимжон Алимов қуйидагича муносабат билдирди:
– Бугунги тождор вирус пандемияси ҳар биримиздан шахсий гигиена ва вирусдан ҳимояланиш бўйича шифокорлар тавсияларига қатъий амал қилишни талаб этмоқда. Халқимизда азал-азалдан қўлини кўксига қўйиб саломлашиб, ўзаро ҳурмат ва эҳтиромини кўрсатган. Бугун айрим юртдошларимиз бир-бирлари билан қўл бериб ёки қучоқлашиб кўришиш вазият тақозосига кўра мумкин эмаслигини чуқур англаши керак ва миллий қадриятларимизга монанд саломлашиш мақсадга мувофиқ. Миллий қадриятларимиз ниҳоятда бой ва ранг-барангдир. Бундай ҳолатларда қўл бериб кўришиш ўрнига икки тараф ўнг қўлини кўксига қўйиб, масофа сақлаб саломлашиши миллий қадриятларимизга ҳам, бугунги гигиеник талабларга ҳам мос келади.
