7 апрель куни 129 нафар фуқаро Самарқанд вилояти саломатликни тиклаш шифохонасида карантинга олиниб, патруллик қўриқловига Марказий ҳарбий округ бўлинмаси жалб этилган эди.
11 апрель куни соат 20.30 да ушбу шифохона ҳудудидан карантинга олинган, Самарқанд шаҳри Чўпонота маҳалласида яшовчи, чет элдан келган 1978 йилда туғилган Ж.К. қочишга уринган. Бу ҳақда Марказий ҳарбий округ ахборот хизмати хабар берди.
Белгиланган йўналишда хизмат олиб бораётган шартнома асосидаги ҳарбий хизматчи, оддий аскар Ш.Жўраев тақиқланган ҳудудни кесиб ўтган тартиббузарни тўхтатган. Шунда фуқаро ҳарбий хизматчига уйига бориб келиши, қайтиб келгандан сўнг уни рози қилишини айтиб, ҳаракатни давом эттирган. Ш.Жўраев тартиббузарни яна бир бор огоҳлантирган ва қатъий чоралар кўрган. Алоқа воситаси орқали берилган хабарга кўра, қисқа вақт ичида тезкор бўлинма етиб келган.
Марказий ҳарбий округ қўмондони кўрсатмасига асосан, карантиндан қочишга уриниб, кўпчилик аҳоли саломатлигига салбий таъсир кўрсатиши мумкин бўлган фуқарони ушлаб қолган ҳарбий хизматчига унвон ва қимматбаҳо совға топширилди.
Фото: sarhad.uz
