Хабарингиз бор, томорқа ер участкаларидан самарали фойдаланмаганлик учун жавобгарликни кучайтириш бўйича Олий Мажлис палаталари Кенгашларининг қўшма қарори қабул қилинди.
ЎзЛиДеП томонидан Маъмурий жавобгарлик кодексининг 65-моддасига биринчи қўшимча сифатида томорқа ер участкасидан оқилона фойдаланмаганлик учун жарима белгилаш таклиф қилинди. “Миллий тикланиш” партияси фракцияси эса бу таклифни қўллаб-қувватламади.
Депутат Расул Кушербаев ҳам мазкур масалага муносабат билдирар экан, унинг бошқа бир жиҳатига эътибор қаратди. Жумладан, у шундай деб ёзади:
“Томорқадан оқилона фойдаланиш айниқса, ўз ҳолига ташланиб, самарасиз ётган томорқа ер эгаларига нисбатан жавобгарликни кучайтириш масаласи шу кунларда алоҳида муҳокама марказига айланди...
Ўзим ҳам кўп йиллардан буён қўлдан келгунча томорқадан фойдаланиб келаётган оддий томорқачи сифатида баъзи бировлар ўз томорқасидан оқилона фойдаланмаслиги нималар билан боғлиқ бўлиши мумкинлигини билдириб ўтмоқчиман.
Биринчидан, томорқачига экаётган экини уруғининг сифатига аниқ кафолат керак. Кўп ҳолларда бозорларда сифатсиз ва ёзувига яраша хосил бермайдиган айниган уруғлар сотилмоқда. Оддий томорқачи эса ҳар доим ҳам буни фарқлай олмайди. Демак бунинг кафолатини ваколатли орган тўлиқ бўйнига олиши, кимки унинг расмий шахобчасидан олган айниган уруғ натижасида зарар кўрса, зарарни қоплаб бериши керак.
Иккинчидан, томорқачига эккан экини учун керакли минерал уғит ва зараркунандаларга қарши дориларни тўсиқсиз сотиб олиш мумкинлигини тўлиқ кафолатлаш зарур. Афсуски томорқачи кўп ҳолларда экинига “селитра” деган ўғитни қайсидир фермердан яширин йўл билан сотиб олишига тўғри келади. Ваҳоланки, унинг томорқасига шу кимёвий ўғит зарур.
Шунингдек, зараркунандаларга қарши дорилар ҳам сифат даражасида эмас. Сўнгги йилларда зараркунандаларнинг кўпайиб кетганлиги ва уларга қарши дориларнинг фойда бермаётгани сифатли маҳсулот етиштиришда томорқачиларни қийнамоқда.
Учинчидан, ва энг муҳими: оддий томорқачи етиштирган маҳсулотининг ўзидан ортган қисмини таннархдан ошиб бозорда сота олиши ёки экспорт қила олишининг кафолати йўқ.
Баҳор ойларида томорқадан фойдалан, дея бонг урган масъуллар томорқачи махсулотини етиштириб, унга ҳаридор топа олмай чириб сарсон юрган вақтида негадир “йўқ” бўлиб қолишади, ҳолинг қалай деб сўрамайди. Бозорда эса томорқачининг ўзи бориб сотишига кафолатланган жойнинг ўзи йўқ, бўлгани ҳам номига. Камига экспортни ҳам ўз “эга”лари бор, улардан ортиб оддий томорқачи экспорт қилолмайди. Масалан, янгийўллик томорқачиларнинг кўпчилиги ҳар йили ҳаражат қилиб турли кўкатлар экади-ю, сотиб олгунча юрагини ҳовучлаб ўтиради: ишқилиб четга йўл ёпилиб қолмасин, экспортчилар олиб кетсин, чегарага инсоф берсин, пулимизни берсин деб. Бу йил ҳам шу: юраклар ҳовучда.
Тўртинчидан, томорқачи экин экиб, бола-чақаси билан ер тирнаб ҳаракат қилса-ю, бироқ кутилмаганда зарар кўрса, уни қўллаб-қувватлаш, керак бўлса зарарига шерик бўлиш тизими йўқ. Бунда томорқачи ўз ёғига ўзи қоврилиб қолаверади.
Бешинчидан, айрим томорқа эгаларининг ерларига сув келмайди, шўр, тошлоқ ва ҳоказо табиий шароитлар йўқ. Буни ҳал этишни кимдир бўйнига олиши керак, бироқ томорқачи эмас.
Энди ўйлаб кўринг: шундай икир-чикир ва баъзиларнинг кўзига кўринмайдиган муаммолар турганда қанчадир томорқачи табиий равишда “рискка” бормай, ҳеч бўлмаса зарар кўрмаслик учун ҳам томорқасини ўз ҳолига ташлаб қўйиши мумкинми? Мумкин. Бунинг учун уни жазолаш адолатдан бўладими шунда? Бу ёғига энди виждон ўртоқлар...
Оширворган бўлсам узр ўртоқлар, бироқ биз томорқамизга экин экиб қўйганмиз”.
