Йўл белгилари ва светофорнинг тақиқловчи ишорасига амал қилмаслик оқибатида йҚашқадарё вилоятининг Чироқчи туманида йўл-транспорт ҳодисаси содир бўлди. Бу ҳақда Ўзбекистон Республикаси ИИВ ЙҲХББ Ахборот хизмати хабар берди.
Воқеа 2020 йилнинг 12 июль куни соат 00:20 ларда Қашқадарё вилояти Чироқчи тумани ҳудудидан ўтувчи 4Р 87 автомобиль йўлининг 47 километрида содир бўлди. Ҳайдовчи 1976 йилда туғилган Хоразм вилояти Хонқа туманида яшаган М.М. ишончнома орқали “Орландо” русумли транспорт воситасини иккинчи даражали йўлдан бошқариб келаётган эди. У “Йўл беринг” йўл белгисига ва светофорнинг тақиқловчи чироғига амал қилмасдан, асосий йўлдан ҳаракатланиб келаётган ҳайдовчи 1979 йилда туғилган Қашқадарё вилояти Чироқчи туманида яшовчи, Б.Я. бошқарувидаги “DAF SXF 105” русумли юк автомашинаси йўлига чиқиб кетиб тўқнашув содир этган.
Натижада “Орландо” русумли транспорт воситаси ҳайдовчиси М.М. ва автомобиль йўловчиси 1983 йилда туғилган Қорақалпоғистон Республикаси Тўрткўл туманида яшаган Т.Ж.лар олган тан жароҳатлари натижасида воқеа жойида вафот этган.
Автотранспорт йўловчилари Қашқадарё вилояти Деҳқонобод туманида яшовчи, 1992 йилда туғилган Қ.Д., Хоразм вилояти Урганч туманида яшовчилар 1983 йилда туғилган А.Ш., 1986 йилда туғилган Қ.Н., 2010 йилда туғилган Ж.Ш., 2013 йилда туғилган Ж.Н. ва 2016 йилда туғилган Ж.Д.лар олган тан жароҳатлари сабабли касалхонага ётқизилган.
Ўзбекистон Республикаси ИИВ ЙҲХББ огоҳлантиради: "Ҳурматли ҳайдовчилар йўлларда ҳаракатланганда йўл ҳаракати қоидаларига сўзсиз риоя қилинг. Белгиланган тезликни оширманг! Йўл белгиларига светофорнинг тақиқловчи ишораларига амал қилинг! Зеро, Сизни уйда оилангиз, жондан азиз фарзандларингиз, ота-онангиз ва аёлингиз кутаётганлигини унутманг!"
