COVID-19га қарши оммавий эмлаш 2021 йил ўрталарида бошланиши мумкин. Бу ҳақда Жаҳон соғлиқни сақлаш ташкилоти раҳбари ўринбосари Сумия Сваминатан маълум қилган.
Унинг сўзларига кўра, ҳозирда 20 дан ортиқ вакциналар клиник синовдан ўтмоқда. Уларнинг баъзиларидан умид бор, ўз самарасини кўрсатмоқда. 2021 йил бошига қадар кутилган натижаларни қўлга киритиш мумкин.
“Янги вирусга қарши антитела қон зардобида бир неча ҳафтадан сўнг йўқ бўлиб кетиши, бу иммунитетнинг йўқлигини исботламайди. COVID-19га қарши ҳужайрали иммунитет механизми ҳали етарлича ўрганилмаган”, деди у.
ЖССТ маълумотларига кўра, вакцинани биринчи навбатда, пандемияга қарши курашнинг олдинги сафида турганлар, шунингдек, кекса одамлар ва гипертония, деменция, диабет каби касалликларга чалинган беморлар олиши керак.
