Bugun ertalab Rossiya prezidenti Vladimir Putin mamlakatda harbiy safarbarlikni e`lon qilgach, ba`zi faollar rossiyaliklarni davlat rahbarining ushbu farmoniga qarshi norozilik namoyishlarini o`tkazishga chaqirgani haqida xabarlar tarqaldi.
Shu munosabat bilan, Tashqi mehnat migrasiyasi agentligi O`zbekiston fuqarolarini ogohlantirmoqda.
Agentlik ushbu davlatda bo`lib turgan O`zbekiston Respublikasi fuqarolaridan bunday ommaviy namoyishlarda ishtirok etmaslikni, Rossiya Federasiyasi qonunlariga rioya etishni va odamlar ko`p to`planayotgan joylarga bormaslikni so`ramoqda.
Eslatilishicha, bu kabi rasman ruxsat berilmagan tadbirlarda qatnashish chet el fuqarolari uchun Rossiya Federasiyasi qonunlariga muvofiq javobgarlikka tortilish yoki davlatdan majburiy chiqarib yuborishga olib kelishi mumkin.
