Республика махсус комиссияси баёнига мувофиқ юртимизда карантин талаблари юмшатилиши муносабати билан жамоат транспорти (метрополитендан ташқари) ҳаракати ҳам жорий йилнинг 17 августидан бошлаб қайта йўлга қўйилади.
"Тошшаҳартрансхизмат"нинг маълум қилишича, санитария ва эпидемиологик орасталикни сақлаш мақсадида транспорт воситаларини дезинфекциялаш қатъий назоратга олинади. Йўналишга чиқиш олдидан ҳар бир ҳайдовчи ва чиптачи тана ҳарорати тиббий меъёрда бўлган ҳолда, тиббий ниқоб ва қўлқоп билан таъминланиши назоратга олинади.
Йўналишга чиқиш олдидан "Тошшаҳартрансхизмат" АЖ таркибидаги ҳар бир автосаройда ҳар бир автобус тўлиқ дезинфекция қинади. Қолаверса, ҳар бир йўналишдан қайтган автобус қайта дезинфекциядан ўтказилади.
Эслатма: Санитария талаблари доирасида йўловчиларнинг автобус салонига чиқишда ва автобус ичида тиббий ниқобда бўлишлари талаб этилади, тиббий ниқобсиз йўловчилар автобус салонига чиқарилмайди.
Ҳурматли йўловчилар!
Карантин талаблари юмшатилиб, барча фаолиятларга эркинлик берилаётгани санитарик қоидаларни четлаб ўтишга ёки унга амал қилмасликка асос бўлмайди. Биргина бепарволик касаллик ўчоқларининг яна авж олишига олиб келиши мумкин. Шундай экан карантин меъёрлари ва белгиланган талабларга оғишмай амал қилиб, ўзимиз ва атрофдагиларнинг саломатлигини сақлашга ўз ҳиссамизни қўшайлик, дейилади хабарда.
