Мексика президенти Андрес Мануэл Лопез Обрадор Россиянинг коронавирусга қарши вакцинасининг самарадорлиги исботланган тақдирда, уни ўзида синаб кўришга тайёрлигини билдирган. Бу ҳақда манбаларга таяниб xs.uz маълум қилди.
«Агар натижалар самарали бўлса, Россия ҳукумати билан алоқа ўрнатамиз», деган у бугун бўлиб ўтган матбуот анжуманида.
«Ва бу масалада ҳеч қандай шубҳа бўлмаслиги учун, мен биринчи бўлиб вакцинани ўзимда синаб кўрилишига розиман», — дейди Лопез Обрадор.
«Бундай муҳим масалада ҳеч қандай мафкура бўлмаслиги керак. Саломатлик — бу энг муҳими. Агар вакцина Россияда, Хитойда илгари пайдо бўлса ва унинг ҳаётни сақлаб қолиш учун самарали эканлиги исботланса, биз дарҳол ҳамкорлик қиламиз», — дейди Лопез Обрадор.
Шунингдек, у ушбу масала юзасидан Россия президенти Владимир Путин билан музокаралар ўтказишга тайёрлигини қўшимча қилган.
Маълумот учун: Россия дунёда биринчи бўлиб, 11 август куни коронавирусга қарши вакцинани рўйхатдан ўтказди. "Спутник V" дея номланган ушбу препарат Россия Федерацияси Соғлиқни сақлаш вазирлигининг Н.Ф. Гамалея номидаги Миллий эпидемиология ва микробиология илмий маркази томонидан ишлаб чиқилган ва июнь-июль ойларида клиник синовлардан ўтган.
