Анадолу ахборот агентлигининг 25 августда берган маълумотларига кўра, Истанбул полицияси ИШИД жангариси деб гумон қилинган шахсни ҳибсга олди. Бу шахс Истанбулда “ҳайратланарли” ҳужумга тайёргалик кўраётган бўлган. Бу ҳақда таржумон.уз хабар берди.
Анадолунинг хабар беришича, Ҳ.С. исмли жангари Истанбулнинг Кучукчекмеке туманидаги меҳмонхонада олиб борилган рейдда қўлга олинган. Унинг хонасидан милтиқ, ўқдонлар ва снарядлар топилган. Ушбу шахс Истанбулнинг Таксим майдони ва унинг атрофидаги ҳудудда ҳужум уюштиришни режалаштириб юрган. У Суриядан Туркияга ноқонуний йўллар билан кирган ва Истанбулгача етиб келган.
Бу шу ойдаги Туркия полицияси ИШИД жангариларининг эҳтимолий ҳужумини тўхтатиб қолган иккинчи ҳолатдир. Икки ҳафта олдин ҳам Бурса вилоятида полиция маҳкамасига ҳужум уюштиришни мақсад қилган ИШИД жангариси қўлга олинганди.
Туркия сўнгги беш йилдан бери ИШИД жангариларининг бир қатор ҳужумларидан азият чекиб келмқода. Уларнинг бири 2017 йилнинг 1 январида Истанбулдаги тунги клубда содир этилган бўлиб, унда 39 киши ҳалок бўлганди.
