Босния ва Герцеговинада Италия ҳарбий контингентига тегишли вертолёт ҳалокатга учради. Оқибатда тўрт киши ҳалок бўлди, яна 11 киши жароҳатланди. Бу ҳақда Reuters Италия Мудофаа вазирлигига таяниб хабар берди.
Маълум қилинишича, ҳодиса 29 октябрь куни Европа Иттифоқининг EUFOR Althea тинчликпарварлик миссияси доирасида хизмат олиб бораётган ICH-47 Chinook русумли ҳарбий транспорт вертолёти билан содир бўлган.
Вертолёт Босния ва Герцеговинанинг Брчко округидаги Горице қишлоғи яқинида қулаган. Ҳалок бўлганларнинг икки нафари Италия армияси ҳарбий хизматчиси, қолган икки нафари эса Италия Қизил хочининг Кўнгилли ҳарбий корпуси аъзолари бўлган.
Вазирлик маълумотига кўра, вертолёт бортида жами 15 киши бўлган. Жароҳатланган 11 нафар фуқаронинг барчаси тиббий ёрдам олмоқда. Уларнинг ҳеч бирининг аҳволи ҳаёт учун хавфли эмас.
Италия мудофаа вазири Гвидо Крозетто ҳалок бўлганларнинг яқинларига ҳамдардлик билдирган. Бош вазир Жоржа Мелони ҳам фожиа муносабати билан жабрланганлар ва уларнинг оилаларига таъзия изҳор этган.
Қайд этилишича, мазкур вертолёт Европа Иттифоқининг Дейтон тинчлик келишуви ижросини назорат қилувчи EUFOR Althea операцияси таркибида хизмат қилган.
Ҳозирда вертолёт ҳалокатининг сабаблари ва ҳодиса тафсилотларини аниқлаш бўйича тергов-суриштирув ишлари олиб борилмоқда.
