Қирғизистонлик оқин Али Туткучев ўз мамлакати мустақиллиги куни муносабати билан ташкил этилган байрам тадбирида президентга қараб коррупция ҳақида қўшиқ айтди. Ушбу видеолавҳа платформа.уз каналида берилди.
Ушбу тантаналарда давлат раҳбаридан ташқари бошқа катта-катта амалдорлар ҳам иштирок этган.
Бахши ўз қўшиғида халқининг ҳуррият йўлидаги курашлари, коронавирус пандемияси пайтида бир тану жонга айланганини мадҳ этди. Вирусга қарши курашда жонбозлик кўрсатаётган шифокорлар, тартиб посбонларига миннатдорчилик билдириб, катта раҳмат айтган.
Аммо «Энди халқнинг дардини айтсам» дея ўз чиқишининг катта қисмини, яъни 7 дақиқасини халқни ўмариш, суд тизими, сайловлар ва божхонадаги коррупцияга бағишлаган.
У, жумладан, қуйидаги мазмунда куйлаган:
Халқдан яширинча ўғирлаётган «каттаконлар»нинг кўпчилиги,
Ва чўнтакларини бошқаларга сездирмасдан тўлдираётган «каттаконлар»нинг кўпчилиги
Улар буюк бўлмаса-да, аммо катта-катта ўғирлашмоқда.
Божхоналарда постлар кўп, уларда тартиб йўқ ва пулларни челаклаб сидириб олишмоқда.
Сайлов қутиларини ўзлаштирган ва овозларни ўғирлайдиган навбатчи сайловчилар кўп.
Саводсизлар соч толасидан кўп".
Оқин «келинг 90 дақиқа куйламайин» дея судлар, божхона ва милиция ҳалол ишлашига тилак билдирган. Беморлар отдай бўлиб кетиб, врачларга эса иш қолмай, телефонини титкилаб ўтирсин, ёшлар ҳалол бўлиб камол топсин деган мазмунда замонавий достонини якунлаган.
