15 март куни Қозоғистоннинг Жамбил вилоятида жойлашган 21742-сонли ҳарбий қисмда бахтсиз ҳодиса содир бўлди. Бу ҳақда “Hronika” нашри хабар берди.
Маълум қилинишича, соат тахминан 19:35 ларда қоровулнинг учинчи постида хизмат олиб бораётган қўриқлаш ходими Ж.А. тасодифан 7,62 мм калибрли SKS карабинидан ўқ узган. Оқибатда ўқ қоровул бошлиғи Б.Ж.га тегган.
Жабрланувчи оғир аҳволда Гвардейский посёлкасидаги ҳарбий госпиталга олиб борилган. Шифокорларнинг барча саъй-ҳаракатларига қарамасдан, у соат 20:18 да вафот этган.
Қайд этилишича, ҳодиса иштирокчилари ҳарбий хизматчилар эмас, балки Мудофаа вазирлиги ҳузуридаги идоравий қўриқлаш хизматида ишловчи фуқаролик шахслари бўлган.
Ҳозирда воқеа юзасидан барча ҳолатлар аниқланмоқда.
Эслатиб ўтамиз, бундан аввал Қирғизистонда мансабдор шахс ўз жонига қасд қилгани ҳақида хабарлар тарқалган эди.
