Рақобатни ривожлантириш ва истеъмолчилар ҳуқуқларини ҳимоя қилиш қўмитаси хусусий авиакомпаниялар — «Centrum Air» ва «Qanot Sharq» фаолиятига оид ҳолатлар юзасидан Фуқаро авиацияси агентлигига расмий сўров юборди.
Аниқланишича, мазкур авиакомпаниялар йўловчилар олдидаги мажбуриятларини тўлиқ бажармаган ва истеъмолчиларнинг қонуний ҳуқуқларини бузган ҳолатлар қайд этилган.
Қўмита маълумотига кўра, сўнгги йилларда авиа қатновлар бўйича тушаётган шикоятлар сони сезиларли ошган. 2025 йилда 127 та мурожаат қайд этилган бўлса, 2026 йилнинг ўтган 4 ойида бу кўрсаткич 145 тага етиб, 114 фоизга ўсган.
Ўрганишлар давомида чипталарнинг ортиқча сотилиши, рейсларнинг кечикиши, кўрсатилмаган хизматлар учун ҳақ ундирилиши ҳамда йўловчиларга етарли маълумот берилмаслиги каби ҳолатлар аниқланган.
Шунингдек, "Истеъмолчиларнинг ҳуқуқларини ҳимоя қилиш тўғрисида"ги қонун, "Ҳаво кодекси" ва "Фуқаролик кодекси" талаблари бир қатор ҳолатларда бузилгани қайд этилган.
Йўловчиларнинг асосий эътирозлари орасида рейсларнинг бир неча соатлаб кечикиши, аэропортларда қолиб кетиш, банд қилинган жойнинг берилмаслиги ҳамда компенсация тўловларининг етарли даражада амалга оширилмаслиги каби муаммолар бор.
Қўмита, шунингдек, авиакомпаниялар томонидан йўловчиларни кутиш вақтида озиқ-овқат, ичимлик суви ва зарур ҳолларда меҳмонхона билан таъминлаш каби мажбуриятлар ҳам тўлиқ бажарилмаётганини таъкидлади.
Мазкур ҳолатлар юзасидан тўпланган маълумотлар Фуқаро авиацияси агентлиги томонидан кўриб чиқилиши ва тегишли чоралар белгиланилиши кутилмоқда.
Рақобат қўмитаси ушбу йўналишдаги ўрганишларни давом эттираётганини ва якуний натижалар бўйича қўшимча ахборот берилишини маълум қилди.
