Президент Шавкат Мирзиёев Ислом цивилизацияси марказига ташриф буюриб, уни халқнинг тарихи ва маънавий меросини намоён этувчи ноёб мажмуа сифатида баҳолади.
Президент Шавкат Мирзиёев Тошкент шаҳрида барпо этилган Ислом цивилизацияси марказига ташриф буюриб, унинг бой экспозициялари, илмий ва маърифий имкониятлари билан танишди.
Давлат раҳбари аввал Қуръони карим залига кириб, марказнинг маънавий “юраги” ҳисобланган ушбу маскандаги ноёб қўлёзмаларни кўздан кечирди. Бу ерда турли сулолалар даврига мансуб 100 дан ортиқ Қуръон қўлёзмалари, жумладан, сомонийлар, темурийлар ва бошқа даврларга оид нодир манбалар жамланган.
Марказ умумий майдони, меъморий ечимлари ва имкониятлари билан дунёдаги йирик илмий-маърифий мажмуалардан бири ҳисобланади. У Ҳазрати Имом мажмуаси ҳудудида 10 гектар майдонда барпо этилган бўлиб, гумбаз баландлиги 65 метрни ташкил этади.
Шунингдек, марказда замонавий музей, кутубхона, илмий лабораториялар ва халқаро ҳамкорлик платформалари ташкил этилган. Кутубхона фондида 45 мингдан ортиқ адабиёт ва 350 минг электрон манбалар мавжуд.
Ташриф давомида Президентга марказда жорий этилган инновацион ечимлар — экспонатларни рақамлаштириш, QR-кодлар орқали маълумот бериш, имконияти чекланган шахслар учун яратилган шарт-шароитлар ҳақида ҳам ахборот берилди.
Марказ қисқа вақт ичида халқаро эътирофга ҳам сазовор бўлди. У нуфузли нашрлар томонидан дунёда энг кўп кутилган музейлар қаторига киритилган.
Президент ўз нутқида мазкур мажмуа халқимизнинг ҳақиқий тарихи ва буюк аждодлари меросини намоён этишга хизмат қилишини таъкидлади:
— Бугун ўзлигимизни англаш йўлида катта тантана бўлди. Бу ерга келган ҳар бир инсон, айниқса ёшларимиз, қандай аждодлар авлоди эканимизни билиши керак, — деди давлат раҳбари.
Ташриф якунида Шавкат Мирзиёев марказнинг Фахрий меҳмонлар китобига дастхат қолдирди.
