BBC нашрининг билдиришича, Калифорниялик Оливер Чу дунёда биринчи бўлиб Хантер синдроми (МПСИИ) деб аталадиган нодир ирсий касалликка қарши махсус ген терапиясини қабул қилди. Бу хасталик одатда боланинг организми ва миясида қайтарилмас ўзгаришларга олиб келади, оғир ҳолларда эса беморлар 20 ёшга етмай ҳаётдан кўз юмади.
Оливердаги ген нуқсони туфайли у ҳужайраларни соғлом сақлаш учун зарур ферментни ишлаб чиқара олмас эди. Манчестер шаҳридаги мутахассислар унинг ҳужайраларини ген терапияси орқали ўзгартириб, касалликнинг ривожланишини тўхтатишга ҳаракат қилди.
Тажрибага раҳбарлик қилган профессор Саймон Жоунс ББCга: “20 йилдан бери шундай натижани кутиб келганман. Оливернинг бу даражада яхши ривожланиши — ҳақиқий қувонч,”— дея фикр билдирди.
Бир йил даволанишдан сўнг, Оливер ҳозир нормал ривожланаётганидан шифокорлар ва ота-онаси жуда мамнун. Онаси Жингру эса: “Бу ҳақда гапирсак, кўзимга ёш келади. Бу ҳақиқий мўъжиза,” — деди.
Оливер — бу терапияни қабул қилган дунёдаги биринчи беш боладан бири. Мутахассислар унинг натижалари келгусида шундай диагноз қўйилган минглаб болалар учун умид эшигини очиши мумкинлигини таъкидламоқда.
