Президент администрацияси раҳбари Саида Мирзиёева Қурбон ҳайити муносабати билан Ўзбекистон халқини самимий табриклади. У ўз мурожаатида миллий қадриятлар, меҳр-оқибат ва инсонпарварлик туйғулари бу муборак айёмда янада ёрқин намоён бўлишини таъкидлади.
“Қалблар эзгуликка тўладиган кунлар”
Саида Мирзиёева табригида Қурбон ҳайити халқни бирлаштирувчи, инсонларни эзгулик ва бағрикенгликка чорловчи улуғ байрам эканини қайд этди.
“Қалбларимиз эзгуликка тўлган бу улуғ кунларда халқимизнинг бебаҳо қадрият ва анъаналари янада ёрқин намоён бўлади — ёши улуғларимизни зиёрат қилиб, дуоларини оламиз, яқинларимизни йўқлаймиз, жигарларимиз билан бир дастурхон атрофида жам бўлиб, меҳр-оқибат ва қувонч улашамиз”, — дейилади табрикда.
“Аллоҳ барча эзгу ниятларни ижобат қилсин”
Табрикда ҳар бир хонадонга тинчлик-хотиржамлик, фаровонлик ва шодлик тилаб қолинган.
“Ушбу файзли байрам ҳар бир хонадонга тинчлик-хотиржамлик, қут-барака, шод-у хуррамлик олиб кирсин. Аллоҳ таоло барча эзгу ниятларингиз, орзу-интилишларингиз ва самимий дуоларингизни ижобат қилсин”, — дея таъкидланган мурожаатда.
Саида Мирзиёева Қурбон ҳайитини саховат, мурувват ва инсонпарварлик тимсоли бўлган улуғ айём сифатида эътироф этди.
