Президент Шавкат Мирзиёев илмий кадрлар тайёрлаш тизимини такомиллаштиришга оид таклифлар тақдимоти билан танишди.
Унда илм-фан соҳасини ривожлантириш, ёш олимларни қўллаб-қувватлаш ва илмий фаолиятдаги ортиқча бюрократик тўсиқларни қисқартиришга қаратилган қатор янгиликлар муҳокама қилинди.
Тақдим этилган таклифларга кўра, сунъий интеллект, яшил энергетика, тиббиёт ҳамда озиқ-овқат хавфсизлиги каби устувор йўналишларда тадқиқот олиб бораётган докторантлар стипендияси 1,7 баробарга оширилади.
Шунингдек, диссертация ҳимояси жараёнлари тўлиқ рақамлаштирилиши режалаштирилмоқда. Бу орқали ортиқча қоғозбозлик, кўп сонли ҳужжатларни чоп этиш ва авторефератларни катта миқдорда тайёрлаш каби талаблар бекор қилинади. Натижада бюрократик жараёнлар қарийб 50 фоизга қисқариши кутилмоқда.
Таклифларга мувофиқ, Олий аттестация комиссияси фаолияти Фанлар академияси тизимида ташкил этилади. Илмий кенгашлар фаолиятини баҳолаш учун эса махсус рейтинг тизими жорий қилиниши назарда тутилган.
Яна бир муҳим янгилик сифатида “Лойиҳа доирасида илмий даража” ва “Амалий докторантура” дастурларини йўлга қўйиш таклиф этилди. Унга кўра, PhD даражаси реал иқтисодиёт корхоналари билан ҳамкорликда амалга ошириладиган лойиҳалар асосида ҳам олиниши мумкин бўлади.
Бундан ташқари, хорижда фаолият юритаётган ватандош олимларни жалб қилган ҳолда Илм-фан маслаҳат кенгаши ташкил этилиши режалаштирилган.
Президент мазкур таклифларни янада пухта ишлаб чиқиш ва илмий тадқиқотлар сифатини ошириш бўйича мутасаддиларга тегишли топшириқлар берди.
