Ўзбекистон коронавирусга чалинган беморларни даволаш учун Кубада ишлаб чиқарилган Biomodulin T препаратини қўллаш масаласини ўрганмоқда.
Куба ташқи ишлар вазирлигига таяниб хабар беришича, Ўзбекистон соғлиқни сақлаш вазири ўринбосари Абдулла Азизов ушбу масалада кубалик расмийлар билан видеоконференцалоқа шаклида музокара ўтказган.
Маълум қилинишича, Biomodulin T дори воситаси Кубанинг Biocen компанияси томонидан ишлаб чиқилган бўлиб, COVID-19'га чалинган ёши катта беморлардаги респиратор симптомларни бартараф этиш учун мўлжалланган. 3 соатдан ортиқ давом этган муҳокамаларда препарат ҳар иккала мамлакат тиббиёт мутахассислари томонидан юқори баҳолангани айтилади.
"Ўзбекистон экспертлари Кубанинг тақдимотини юқори баҳолаб, икки мамлакатнинг соғлиқни сақлаш ва дори-дармон соҳаларидаги ҳамкорлигини чуқурлаштиришга қизиқиш билдиришди", – дейилади Куба ТИВ ахборотида.