“Ўзбеккино” Миллий агентлиги буюртмасига биноан суратга олинаётган режиссёр Ҳилол Насимовнинг “Мерос” бадиий фильмининг суратга олиш ишлари айни кунларда Жиззах вилоятининг Зомин тоғ ҳудудларида давом этмоқда.
“Ўзбеккино” Миллий агентлиги Ахборот хизматининг хабар беришича, суратга олиш жараёнида эпизодлар ва оммавий саҳналар учун Қорақалпоғистон, Самарқанд, Қашқадарё вилоятлари театрларидан актёрлар ташриф буюришган.
Мазкур фильм ўзбек ва қозоқ халқларининг қадимий дўстлиги, анъана ва эътиқодларининг бирлиги ҳақида ҳикоя қилади. Бош қаҳрамонлар Бахшулло ва Айгул персонажларининг тақдири ва армонли муҳаббати орқали икки халқнинг анъанавий либослари, қадимий урф-одатлари, одамлардаги содда ва ёрқин характерларни кўриш мумкин.
Фильмни суратга олиш ишлари Зоминда якунлангач, Қўқон шаҳрида ҳамда Белоруссия давлатида бўлиб ўтиши режалаштирилган.
