Коронавирусга қарши вакцина бутун Евроиттифоқ аҳолисига етмай қолиши мумкин

Евроиттифоқ аҳолисининг бир қисмигина 2022 йилгача коронавирусга қарши вакцина олиши мумкин, чунки Евроиттифоқ буюртма қилиб қўйган COVID-19’га қарши потенциал дорилар самарасиз бўлиб чиқиши ёки кам миқдорда ишлаб чиқарилиши мумкин, деб ёзади «РБК».

«2021 йил охиригача бутун аҳоли учун етадиган COVID-19’га қарши вакцина дозаси бўлмайди», — деган Еврокомиссия вакили Евроиттифоқ дипломатлари билан ўтказилган ёпиқ мажлисда.

Евроиттифоқ коронавирусга қарши жами 1 миллиарддан ортиқ дозада потенциал вакцина буюртма қилиб қўйган. Уларни AstraZeneca, Sanofi ва Johnson & Johnson каби компаниялар ишлаб чиқмоқда.

Johnson & Johnson’нинг бўлинмаси Janssen Pharmaceutica NV билан шартнома октябрь бошида тузилган эди. Шартномага кўра, агар дори хавфсиз ва самарали бўлиб чиқса, Евроиттифоқ мамлакатлари уни 200 миллион киши учун сотиб олади.