7 январь куни Тошкент шаҳридаги Алишер Навоий номидаги давлат академик катта театри олдида очиқ муз майдони ишга туширилди.
Ўзбекистон Республикаси Туризмни ривожлантириш давлат қўмитаси ташаббусига кўра, “Очиқ осмон остидаги шаҳар муз майдони” лойиҳаси Тошкент шаҳар ҳокимияти, Маданият вазирлиги ҳамда унинг ҳузуридаги Маданият ва санъатни ривожлантириш жамғармаси, “Art Uz Promotion Agency”, шунингдек “Saxovat” ва “Weber” савдо белгилари ҳамкорлигида йўлга қўйилди.
Очиқ осмон остидаги муз майдони лойиҳасини Бош вазир ўринбосари, Туризмни ривожлантириш давлат қўмитаси раиси Азиз Абдуҳакимовнинг табрик нутқи ўқиб эшиттирилди:
“Президентимизнинг “Соғлом турмуш тарзини кенг татбиқ этиш ва оммавий спортни янада ривожлантириш чора-тадбирлари тўғрисида”ги фармони ижроси доирасида мамлакатимизда аҳолининг спорт билан шуғулланиши ва соғлом турмуш тарзига риоя қилиши учун қатор шароитлар яратилмоқда. Тошкент шаҳрида очиқ осмон остидаги муз майдонининг ишга туширилиши ҳам шулар жумласидандир. Лойиҳадан кўзланган мақсад аҳоли орасида соғлом турмуш тарзи ҳамда спортни кенг тарғиб қилишдан иборат. Юртдошларимиз бир ой мобайнида шу ерга ташриф буюриб, ўз вақтларини мазмунли ва фойдали ўтказишлари мумкин. 2021 йилнинг мамлакатимизда “Ёшларни қўллаб-қувватлаш ва аҳоли саломатлигини мустаҳкамлаш йили” деб эълон қилинганини инобатга оладиган бўлсак, ушбу лойиҳанинг амалга оширилиши айни муддаодир”.
Пойтахт марказидаги мазкур муз майдони бир ой муддатга ўрнатилган бўлиб, бу вақт мобайнида очиқ осмон остидаги муз майдонида қатор маданий-кўнгилочар ва спорт тадбирлари ташкил этилади. “Dance Music Fest Winter”, “Iosis Fest”, “Tashkent Rap Festival” мусиқий фестиваллари, шунингдек хоккей бўйича ўсмирлар чемпионати, муз устида рақс шоуси каби тадбирлар шулар жумласидандир.
Шаҳар муз майдони очилишида Россия муз спорти юлдузи, фигурали учиш бўйича Олимпия чемпиони Алексей Ягудин ўзининг «Қиш» дастури билан иштирок этди. Шу билан бирга, очиқ осмон остидаги муз майдони очилишида ўзбек эстрадаси юлдузлари ҳам ўз чиқишлари билан қатнашди.
Очилиш маросимида куни-кеча ижтимоий тармоқларда мурожаат билан чиққан Амир Искаков ҳам таклиф қилиниб, унга Туризмни ривожлантириш давлат қўмитаси томонидан хоккей спорт анжомлари ва махсус спорт кийими совға қилинди.
Шунингдек, ташкилотчилар томонидан фуд-корт зона хизмати йўлга қўйилиб, унда пойтахтнинг тез овқатланиш, қандолатчилик ва қаҳва брендлари фаолият юритмоқда. Майдон олдида чанғи ва бошқа учиш аксессуарлари ижара пункти хизмати йўлга қўйилди.
Муз майдонида ҳаракатланиш бепул.
7 январдан бошлаб ҳар куни соат 9 дан 12 гача Шаҳар очиқ осмон остидаги муз майдонида Ўзбекистоннинг хоккей, фигурали учиш ва муз устидаги рақс бўйича бепул машғулотлари ўтказилади. Кечки вақт эса хоккей бўйича болалар турнири ҳамда ёш фигуристларнинг кўргазмали чиқишлари бўлиб ўтади.
