Ўзбекистондаги Ислом цивилизацияси маркази қурилиш ишлари 2021 йил охирги чорагигача якунланиши мумкин. Бу ҳақда 2021–2023- йилларга мўлжалланган инвестиция дастурида келтирилган.
Россиялик миллиардер Aлишер Усмоновга тегишли УСМ Ҳолдингс Лимитед компанияси молиялаштираётган Олмазор туманида жойлашган Ислом цивилизацияси марказининг умумий лойиҳа қиймати 119 миллион AҚШ долларига тенг.
Президент Шавкат Мирзиёев 2017 йили Ҳазрати Имом (Хастимом) мажмуасида бўлиб, мазкур марказ қурилиш лойиҳаси билан танишиб, марказ қурилишига Aлишер Усмонов кўмак бераётганини маълум қилганди.
“Ватандошимиз Aлишер Бурҳонович Усмонов биз билан ҳамкорлик қилиб, катта мадад бўляпти. Ватандошимизнинг шундай бир катта кўмак кўрсатиши тарихда қолиши керак. Бу бино ўзбек миллатининг тарихида қолиши керак”, – деган эди Шавкат Мирзиёев.
Бундан ташқари, Aлишер Усмонов Ислом цивилизацияси марказига 8 миллион AҚШ долларига тенг бўлган нодир китоблар коллекциясини совға қилган.
