Мамлакатимиз элчиси Бахром Ашрафхонов ва Озарбайжон Миллий Фанлар академияси (ОМФА) вице-президенти, Низомий Ганжавий номидаги адабиёт институти директори Исо Ҳабиббейли ўртасида учрашув бўлиб ўтди, дея хабар бермоқда «Дунё» АА.
Дипломатик миссия маълумотига кўра, суҳбат аввалида меҳмонга мамлакатимизда маданий-маърифий ва адабий соҳада олиб борилаётган ишлар ва ўзгаришлар хусусида маълумот берилди.
Шунингдек, буюк мутафаккир ва шоир Алишер Навоийнинг 580 йиллиги, шоҳ ва шоир Заҳириддин Муҳаммад Бобур таваллудининг 536 йиллиги муносабати билан халқаро онлайн-конференциялар ташкил этишдаги ҳамкорлик учун миннатдорлик билдирилди.
Мулоқотда Низомий Ганжавий номидаги адабиёт институти бўлими мудири, профессор Алмаз Улви томонидан озарбайжон тилида ёзилган «Алишер Навоий асри ва насри» китобининг тақдимотини, Ўзбекистон халқ шоири Абдулла Орипов ва Ўзбекистон халқ ёзувчиси Ўткир Ҳошимов таваллудининг 80 йиллигига бағишланган тадбирларни ўтказиш ҳамда буюк аждодимиз Заҳириддин Муҳаммад Бобур ҳайкалини Озарбайжонда ўрнатилишда яқин ҳамкорлик таклифи илгари сурилди.
ОМФА вице-президенти Президент Шавкат Мирзиёев томонидан сўнги йилларда сиёсий-иқтисодий, маданий-маърифий соҳаларда самарали ислоҳатлар амалга оширилаётганини таъкидлади.
Исо Ҳабиббейли элчихона томонидан берилган таклифларни қўллаб қувватлаб, Заҳириддин Муҳаммад Бобур ҳайкали Озарбайжонда, Ўзбекистонда эса Фузулий ҳайкалининг ўрнатилиши икки давлат ўртасидаги адабий алоқаларни янада ривожлантиришга ҳисса қўшишини таъкидлади.
Учрашувда Ўзбекистон Вазирлар Маҳкамасининг Давлат тилини ривожлантириш департаменти ташаббуси билан мамлакатимиз Фанлар академияси Ўзбек тили, адабиёти ва фольклори институтининг бир гуруҳ олимлари томонидан тайёрланган беш жилдли «Ўзбек тилининг изоҳли луғати» китобининг тақдимоти ўтказилди.
Китоб тўпламининг бир нусхаси ОМФАга ва яна бир нусхаси Академиянинг Н.Ганжавий номидаги адабиёт институти бўлими қошидаги Алишер Навоий марказига тақдим этилди.
