“Ёшлар ижод саройи”да Ўзбекистон электрон оммавий ахборот воситалари миллий ассоциацияси ташаббуси билан “Янги Ўзбекистон. Янги нигоҳ” медиа-ҳафталиги доирасида 6 май куни “Дебют-2021” танлови ғолибларини тақдирлаш маросими бўлиб ўтди.
Маросимнинг очилишида Ўзбекистон Республикаси Бош вазирининг ўринбосари Азиз Абдуҳакимов, Ўзбекистон Электрон оммавий ахборот воситалари бошқаруви раиси Фирдавс Абдухолиқов, Ўзбекистон Халқ артисти Хайрулла Саъдиев ва бошқалар сўзга чиқиб, ҳукуматимиз томонидан ёшларни қўллаб-қувватлаш, хусусан кинематография соҳасидаги ўзгаришлар ҳақида сўз юритишди. Тадбирда ушбу танлов учун 5 миллиард сўм ажратилгани, бу маблағ ёш киноижодкорлар суратга олиши кутилаётган қисқа метражли фильмларни молиялаштиришга ажратилиши таъкидланди.
Ўзбекистон Кинематография агентлигидан маълум қилишларича, “Дебют-2021” танловига ёш киноижодкорлар томонидан 200 га яқин кинолойиҳалар топширилган. Агентлик бадиий кенгаши аъзоларидан тузилган махсус комиссия томонидан улар орасидан энг яхши 16 та кинолойиҳа танлаб олинган ва фильм суратга олиш учун тавсия этилган. Тадбирда мазкур кинолойиҳаларнинг муаллифларига тегишли сертификатлар топширилди.
Маросим сўнгида ёш кинорежиссёр Маҳлиё Аскаралиева томонидан суратга олинган Лола. Қуёш ва мен” қисқа метражли бадиий фильми томошабинлар эътиборига ҳавола қилинди.
