Ўзбекистон Республикаси Бош вазир ўринбосари, Туризм ва спорт вазири Aзиз Aбдуҳакимов ва Кинематография агентлиги бош директори Фирдавс Aбдухолиқов ёш истеъдодли киноижодкорларга грантлар топширди.
Тантанали маросим 3-7 май кунлари бўлиб ўтаётган “Янги Ўзбекистон. Янги нигоҳ” медиа-ҳафталиги доирасида ўтказилди. Грантлар питчинг жараёнида танлаб олинган ёш киноижодкорларга филмлар яратиш учун тақдим этилди.
“Бугунги кунда давлатимиз раҳбари ташаббуслари билан қабул қилинган “Ёшларни қўллаб-қувватлаш ва аҳоли саломатлигини мустаҳкамлаш йили” давлат дастури доирасида кенг қамровли ишлар қилинмоқда, хусусан ёш авлоднинг билим ва кўникмаларини оширишга қаратилган янги лойиҳалар амалга оширилмоқда. Жумладан, яқинда Президентимиз томонидан имзоланган фармон ва қарорларда миллий кинематграфияни ривожлантириш, соҳага кириб келаётган ёшларга ҳар тарафлама эътибор қаратиш юзасидан қатор мақсад ва вазифалар белгилаб берилган.
Хусусан, кино санъати ва саноати вакилларининг муаллифлик ҳуқуқларини жамоавий асосда бошқарадиган Ўзбекистон кино саноати вакиллари уюшмасини ташкил этиш, олий таълим муассасаларининг кинематография йўналишида таълим олаётган талабаларини қўллаб-қувватлаш учун Худойберган Девонов номидаги давлат стипендиясини таъсис этиш, “Олтин Хумо” миллий кино мукофоти тақдимотини ҳар йили анъанавий равишда ўтказиб бориш, Aгентлик ва Ўзбекистон кино саноати вакиллари уюшмаси муассислигида Миллий кинематографияни ривожлантириш марказини тузиш шулар жумласидандир. Буларнинг барчаси энг аввало ёшларимизнинг медиа ва кинематографияга қизиқиш ва интилишларларини қўллаб-қувватлашга қаратилган.
Ушбу тадбирларда фаол иштирок этаётган йигит-қизлар орасидан мамлакатимиздаги жараёнларни холис ва ва ҳаққоний ёритишга қодир журналистлар, иқтидорли режиссёрлар, операторлар, ссенаристлар етишиб чиқиши керак”, - деди Aзиз Aбдуҳакимов.
Шу ўринда Ўзбекистон кинематография агентлиги бош директори Фирдас Aбдухолиқов ҳам соҳага бўлган юксак эътиборни алоҳида эътироф этиб ўтди: “Ўтган йилнинг декабр ойида ушбу лойиҳа ҳақида эълон қилган эдик. Aлоҳида комиссия тузилиб, энг яхшилари сараланиб, мана бугун улар тақдирланмоқда. Бугун ютқазганлар йўқ, зеро Президентимиз ва ҳукумат томонидан кинематография соҳасига бўлган эътибор ҳамда бу йўналишда имзоланаётган ҳужжатлар барча киноижодкорларни қўллаб-қувватлашга йўналтирилган”.
Тадбирда шунингдек Ўзбекистон халқ артисти Хайрулла Саъдиев ҳам иштирок этиб, ёш киноижодкорлар фаолиятига оқ йўл тилади. “Медиаҳафталик доирасида бўлаётган тадбирлар ҳамда ёшларга бўлган эътиборни кўриб, ич-ичимдан сизларга ҳавасим келяпти. Президентимиз бугун барча соҳаларда ёшлар учун ҳамма эшикларни, имкониятларни очиб қўйдилар - ёшларимиз меҳнат қилиб элнинг назарига тушсин, юртининг севимли фарзанди бўлсин деб, бунинг учун уларга катта раҳмат деб қоламиз. Кино соҳасини ривожлантириш бўйича имзоланган фармон ва қарорлари ҳам ёш киноижодкорларга қанчадан-қанча имкониятларни бермоқда. Шундай экан, ишонамизки, сизларни орангиздан Ўзбекистонда кино соҳасини юксалтирувчи инсонлар етишиб чиқади ва ўзбек киноси албатта ўз ўрнини мустаҳкамлайди”, - деди у.
Бундан ташқари, тадбир доирасида ёш кинорежиссёр Маҳлиё Aсқаралиеванинг “Галдир” (“Лола, қуёш ва мен”) қисқа метражли филми премера қилинади. Филм агентлик буюртмасига биноан “Ёшлар ижодий-тажриба студияси” ДУК томонидан суратга олинган. Кинокартина психологик драма жанрида олинган бўлиб, Офтоб исмли дизайнер қизнинг ҳаётида юз берган қизиқарли воқеалар ҳақида ҳикоя қилади. Премерада филм ижодкорлари ҳам иштирок этишди.
Премерадан сўнг таниқли эстрада ва кино юлдузлари иштирокида шоу-консерт дастури ўтказилди.
Таъкидлаш жоизки, медиаҳафталик доирасида хорижий меҳмонлар иштирокида ҳам қатор тадбирлар ўтказилмоқда, бу эса Ўзбекистонда кинотуризмни ривожлантиришда ҳам муҳим ўрин тутади.
