Кеча, 7 май куни 11:00да Алишер Навоий номидаги киносаройда Кинематография агентлиги томонидан Хотира ва қадрлаш куни муносабати билан ташкил этилган кино-ҳафталикка старт берилди.
Ҳафталик давомида иккинчи жаҳон урушида қатнашган ўзбекистонликларнинг матонати ҳақида сўзловчи бир қатор ҳужжатли ва бадиий фильмлар намойиши ҳамда кўнгилочар дастурлар ўтказилмоқда.
Шунингдек, Ўзбекистон маданий меросини ўрганиш ва сақлаш Бутунжаҳон жамияти билан ҳамкорликда чет эл кинофондларидан рақамлаштириб, юртимизга қайтарилган ўзбек фильмлари классик дурдоналари тақдимоти ва намойишлари бўлиб ўтяпти. Ушбу фильмлар орасида “Сен етим эмассан”, “Жарроҳ”, “Генерал Раҳимов”, “1941 йил олмалари”, “Унутилмаган қўшиқ” каби дурдона асарлар мавжуд. Эътиборли жиҳати улардан айримлари илк бора тўлиқ ва асл ҳолатда телевидение орқали намойиш этилади.
Ҳафталикнинг илк кунида Кинематография агентлиги ва Самарқанд вилояти ҳокимлиги билан ҳамкорликда суратга олинган “Матонат” ҳужжатли фильмининг премьераси ўтказилди. Ундан сўнг, “Мерос” тарихий драмасининг катта премьераси бўлиб ўтди.
Ушбу фильм иккинчи жаҳон уруши давридаги ўзбек ва қозоқ ёшларининг муҳаббати ҳақида ҳикоя қилади. Шу билан бирга кино-ҳафталик давомида Кинематография агентлиги буюртмасига биноан режиссёр Али Ҳамроев раҳбарлиги остида тўрт нафар ёш киноижодкорлар томонидан суратга олинган “Унутилмас қаҳрамонлар” туркум ҳужжатли фильмларининг ҳам премьераси ўтказилди. Ушбу туркумдан Зебо Ғаниева, Қудрат Суюнов, Иноят Наврўзбоев, Мамадали Топволдиев каби ўзбекистонлик уруш қаҳрамонлари ҳақидаги ҳужжатли фильмлар ўрин олган.
Ўтган йил миллий телевизион премьераси ўтказилган “Илҳақ” бадиий фильми ва “Матонат” ҳужжатли киноасари яна “Унутилмас қаҳрамонлар” туркум ҳужжатли фильмлари сана муносабати билан Ўзбекистон телеканалларида тақдим этилади. Юртимиз аҳолиси ушбу фильмларни 9 май арафасида телеэкранлар орқали томоша қилиш имкониятига эга бўлишади.
Ҳафталик давомида яна кўплаб намойиш ва маърифий дастурлар бўлиб ўтиши белгиланган. Ушбу ҳафталик байрам арафаси юртдошларимизга муносиб туҳфа бўлиши кутилмоқда.
Кинематография агентлиги Ахборот хизмати
