“Ўзбекнефтгаз”: Газли нефть ва газ қазиб чиқариш бошқармасидаги бўш иш ўринларига ёш мутахассисларни қабул қилди

  “Ўзбекнефтгаз” АЖ Бошқаруви раиси топшириғига биноан, Газли нефть ва газ қазиб чиқариш бошқармасидаги бўш иш ўринларни малакали кадрлар билан тўлдириш мақсадида номзодлар ўртасида саралаш танлови ўтказилди. Бу ҳақда “Ўзбекнефтгаз” АЖ Матбуот хизмати хабар берди.

 Маълум қилинишича, олий таълим муассасаларини тугаллаган жами 89 нафар ёш мутахассислардан 11 та йўналиш бўйича яъни, бурғилаш, геология, қазиб чиқариш, маркшейдер, механика, техника хавфсизлиги, технология, харидлар, экология, газни қайта ишлаш, иқтисодиёт ва режалаштириш йўналишларида тест имтиҳонлари олинган. Хусусан, жорий йилнинг 10 июн куни бошқармада бўш лавозимларга олий маълумотли номзодларни танлаб олиш икки босқичда бўлиб ўтган.

1-босқичда талабгорларнинг асосий билимларини аниқлаш учун тест синовлари ўтказилди. Тартибга кўра, агар талабгор тест якунлари бўйича 70 ва ундан ортиқ балл тўпласа, у иккинчи босқичга киритилиши мумкин.

2-босқичда комиссия аъзолари томонидан тест якунлари бўйича 70 ва ундан ортиқ балл олган иштирокчилар билан суҳбат ўтказилган.

Юқори балл тўплаган ёш номзодлар билан “Ўзбекнефтгаз” АЖ Персонални бошқариш департаменти бошлиғи Анвар Авезов ҳамда бошқарманинг мутасадди раҳбарлари иштирокида суҳбат ўтказилди. Унда талабгорларнинг билим-савияси, кўникмалари, иш тажрибалари аниқланди, Бошқармадаги ва ўрта бўғиндаги вакант иш ўринлари учун ёш номзодлар танлаб олинган.

 Танлов натижасига кўра, 12 нафар номзод Газли нефть ва газ қазиб чиқариш бошқармасидаги муҳандис-техник ходимларнинг бўш иш ўринларига ишга жойлашиш учун тавсия этилган. Талабгорларнинг 3 нафари техника хавфсизлиги ва меҳнат муҳофазасига, 3 нафари геология йўналишига, 1 нафари технология йўналишига, 1 нафари газни қайта ишлашга, 2 нафари менежер йўналиши, 1 нафари ғазначилик йўналиши ва 1 нафари харидлар йўналиши бўйича турли лавозимларга муносиб кўрилиб, уларни ишга қабул қилиш таклифи комиссия аъзолари томонидан маъқулланган.

Таъкидлаш жоизки, номзодларни танлаш жараёни видеокузатув ёрдамида, шунингдек, “Ўзбекнефтгаз” АЖ ижро аппарати кузатуви орқали амалга оширилган. “Ўзбекнефтгаз” АЖ Бошқаруви раиси топшириғига асосан, Бошқармада ҳамда ўрта бўғиндаги мавжуд вакант иш ўринларини тўлдириш мақсадида, комиссия аъзолари ишга кирувчи талабгорлардан тест имтиҳонлари олиш ҳамда суҳбат ўтказиш ишлари доимий равишда тизимли йўлга қўйилган.Мавжуд вакант лавозимларга имтиҳондан ўтган талабгорлар билан ўрнатилган тартибда меҳнат шартномаси тузилиши ҳамда уларга мураббий тайинланиши белгиланган.