Адлия вазирлигида Ўзбекистон Республикаси Президентининг “Коррупцияга қарши муросасиз муносабатда бўлиш муҳитини яратиш, давлат ва жамият бошқарувида коррупциявий омилларни кескин камайтириш ва бунда жамоатчилик иштирокини кенгайтириш чора-тадбирлари тўғрисида” Фармони ҳамда “Коррупцияга қарши курашиш фаолиятини самарали ташкил этишга доир қўшимча чора-тадбирлар тўғрисида” қарори лойиҳалари ҳамда улар бўйича жамоатчиликдан келиб тушган таклифларни муҳокама қилиш мақсадида давра суҳбати ўтказилди.
Тадбирда 2021–2022 йилларга мўлжалланган коррупцияга қарши курашиш бўйича давлат дастури лойиҳаси ҳаммуҳокама қилинди. Дастурда вазифаларни манзилли ижро этишни таъминлашга қаратилган 40та аниқ чора-тадбирлар мавжуд
Шунингдек, тадбирда Ўзбекистон Республикаси Президентининг коррупцияга оид фармон ва қарори лойиҳалари бўйича ўтказилган жамоатчилик муҳокамаси натижалари эълон қилинди. Таъкидланишича, жамоатчиликдан фармон лойиҳаси бўйича 139 та ва қарор лойиҳаси бўйича 60 та, жами 200 та таклифлар келиб тушган. Уларнинг аксарияти инобатга олиниб, фармон ва қарор лойҳалари ҳамда давлат дастурига киритилди.
Давра суҳбати иштирокчилари Ўзбекистон Республикаси Президентининг коррупцияга оид фармон ва қарори лойиҳаларининг қабул қилиниши мамлакатимизда коррупцияга қарши муросасиз муҳит яратиш, давлат ва жамият бошқарувида коррупциявий омилларни кескин камайтириш, ушбу жараёнга кенг жамоатчиликни сафарбар этиш, шунингдек, Ўзбекистоннинг нуфузли халқаро рейтинглардаги ўрнини яхшилашга хизмат қилишини таъкидлаб ўтишди.
