30-июл куни Сеулга амалий ташриф билан келган Ўзбекистон Республикаси Ташқи ишлар вазири Aбдулазиз Камилов Корея халқаро ҳамкорлик агентлиги (KOICA) президенти Сон Ҳёк Санг билан учрашди. Бу ҳақда Ташқи ишлар вазирлигининг Матбуот хизмати маълум қилди.
Томонлар Ўзбекистон ва KOICA ўртасидаги алоқаларнинг ҳолати ва истиқболларини муҳокама қилдилар.
Таъкидланганидек, ҳамкорлик йилларида KOICA Ўзбекистонда ижтимоий-иқтисодий соҳадаги муҳим дастурларни амалга оширишда асосий халқаро шериклардан бирига айланди. Aгентликнинг Ўзбекистондаги ваколатхонаси очилганидан буён умумий қиймати 130 миллион AҚШ доллари миқдоридаги 32 дан ортиқ лойиҳалар амалга оширилди, 2 мингдан ортиқ ўзбекистонлик мутахассисларнинг Корея Республикасида амалиёти ташкил этилди, 570 дан ортиқ KOICA кўнгилли экспертлари жалб қилинди.
Президент Мун Чже Иннинг 2019-йил апрел ойида давлат ташрифи доирасида имзоланган 2020-2022-йилларга мўлжалланган Ҳамкорлик дастури доирасидаги қўшма лойиҳалар юзасидан фикр алмашилди.
Таълим ва соғлиқни сақлаш соҳасида янги лойиҳаларни амалга ошириш бўйича таклифлар кўриб чиқилди.
Суҳбат сўнгида вазир KOICA раҳбарини Ўзбекистонга ташриф буюришга таклиф қилди.
