Ховос тумани ҳудудида крипто-актив қурилмаларидан (“Майнинг”-ферма) ноқонуний фойдаланиш ҳолатини аниқлаш борасида тезкор тадбир ўтказилган. Тезкор тадбир давомида, Ховос туманида яшовчи Ўзбекистон фуқароси Э.Д.нинг яшаш хонадони ёрдамчи хўжалик бинолари кўздан кечирилганида, Ўзбекистон фуқароси Х.И. компьютер эҳтиёт қисмларидан (видеокарта, блок питания, хотира картаси, плата) қўлбола усулда ясалган, катта ҳажмдаги крипто-актив қурилмаларидан (“Майнинг”- ферма) лицензиясиз ноқонуний равишда шуғулланиб келаётганлиги аниқланган. Бу ҳақда вилоят божхона бошқармаси Ахборот хизмати маълум қилди.
Тадбир давомида ушбу ҳолат юзасидан туман электр тармоқлари корхонасидан мутахассис иштирокида электр энергиясидан фойдаланиш ҳолати ўрганилганда, қонунга хилоф равишда 265,2 млн. сўм миқдорида электр энергиясидан ноқонуний фойдаланиш ҳолати аниқланиб, белгиланган тартибда мутахассислар томонидан далолатнома расмийлаштирилди ҳамда ушбу тезкор тадбир давомида фуқаро Э.Д. ва Х.И.лардан 11 турдан иборат, жами 3529 дона, тахминий қиймати 9,2 млрд. сўмлик компьютер қурилмалари ва бошқа турдаги товар-моддий бойликлари ашёвий далил сифатида вақтинча сақловга олинган.
Дастлабки текширув ва суриштирув натижасида бундай ноқонуний фаолиятни Корея давлати фуқароси S.Y. ва Ўзбекистон фуқароси Х.И.лар ўзаро олдидан тил бириктириб, Ўзбекистон Республикаси Президентининг 2018 йил 3 июлдаги “Ўзбекистон Республикасида Рақамли иқтисодиётни ривожлантириш чора-тадбирлари” тўғрисидаги қарор талабларини зид равишда бузиб фаолият олиб бораётганлиги маълум бўлган.
Мазкур ҳолат юзасидан бугунги кунда божхона органлари томонидан божхона текширувлари ва суриштирув ишлари олиб борилмоқда.
