Тошкент вилояти ҳокимлиги хизмат машиналари учун "Chevrolet Malibu" ва "Tracker" автомобилларини сотиб олгани ҳақидаги хабар ижтимоий тармоқларда кенг муҳокамаларга сабаб бўлган эди.
Вилоят ҳокимлиги ҳақиқатдан ҳам маҳаллий бюджетнинг 2021 йил II чорак якуни билан шаклланган даромадлар режасининг орттириб бажарилган қисми ҳисобидан “Chevrolet Malibu” ҳамда “Tracker” хизмат автотранспортларини харид қилиш учун 610 миллион сўм ажратилганлигини тасдиқлади. Бу ҳақда Тошкент вилояти ҳокимининг жорий йил 26 августда тегишли фармойиши қабул қилинган.
Маълумот ўрнида Тошкент вилояти ҳокимлиги учун ҳукуматнинг қарорлари асосида 18 та хизмат автотранспортлари ажратилгани келтирилган. Маълум қилинишича, вилоят нисбатан катта ва унинг салмоқли қисми тоғли ҳудудлардан иборат бўлгани учун мавжуд автотранспорт воситаларининг 5 таси муддатидан олдин техник носоз ҳолга келган. Уларнинг хизматга яроқсизлиги бўйича тегишли тартибда далолатномалар тузилган.
Юқоридагилардан келиб чиқиб, вилоят ҳокими ўринбосарларининг иш фаолияти самарадорлигини ошириш, бевосита ҳудудларга чиқиш билан боғлиқ ишларни унумли ташкиллаштириш мақсадида, 369 миллион сўмлик 1 дона “Chevrolet Malibu” ҳамда 232 миллион сўмлик 1 дона “Tracker” харид қилиш бўйича 6 сентябрь куни тегишли шартномалар имзоланган.
