Қашқадарё вилояти денгиз сатҳидан тахминан 3000 метргача баланд жойлашган Ҳисор тоғ тизмаларида қор ёғгани акс этган видеолар тарқалмоқда.
«Ўзгидромет» мутахассиси Эркин Абдулаҳатов табиат ҳодисаси бўйича изоҳ берди.
"Видео 11-12 сентябр оралиғида олинган бўлиши мумкин. Бу пайтда республиканинг жуда баланд(3000 мдан юқори) тоғли ҳудудларда нам ҳаво массалари ортидан, ҳаво ҳароратининг нол даражагача пасайиши ва тўйинган сув буғлари кристаллашиб қорга айланган бўлиши мумкин.
"Ўзгидромет"нинг Қашқадарё вилоятида энг баландда жойлашган метеорологик станцияси ''Мингчуқур'' метеорологик станцияси бўлиб, у денгиз сатҳидан 2200 метргача баланд тоғликда жойлашган. Станцияда ўтган 4-5 кунда ҳаво ҳарорати нол даражадан паст кузатилмади. Табиийки, у ерда қор ҳам ёғмади.
"Ўзгидромет"да Мингчуқур МСдан баландда жойлашган метеорологик кузатув станциялари бўлмагани учун юқори тоғ тизмаларида қор ёғган ёки ёғмаганлиги тўғрисида Ўзгидромет"да ҳам маълумот бўлмаслиги аниқ", - дейилади мутахассис изоҳида.
