Сурхондарё вилоятининг Жарқўрғон туманида 5-синф ўқувчиси қўшнисига тегишли Spark автомобилини бошқаргани акс этган видео ижтимоий тармоқларда тарқалди. Ҳолат юзасидан Йўл ҳаракати хавфсизлиги бошқармаси ходимлари ўқувчи ва унинг онаси билан профилактик суҳбат ўтказди.
Маълум қилинишича, тумандаги 19-мактабнинг 5-синф ўқувчиси қўшнисига тегишли автомобилни бошқариб, бу жараённи видеога олган ва ижтимоий тармоқларга жойлаган.
Ҳолат аниқланганидан сўнг Сурхондарё вилояти ЙҲХБ ходимлари вояга етмаган бола ва унинг онаси билан профилактик суҳбат ўтказган. Ҳуқуқбузарлик юзасидан қонуний чора кўрилган.
Ўқувчининг онаси Аcима Ғулзорова ўғлининг автомобиль бошқарганидан бехабар бўлганини айтди. У фарзандининг машина ҳайдашга қизиқиши борлигини билганини, бироқ бундай ҳолат юз беришини кутмаганини билдирди.
“Ўғлимнинг машина ҳайдашидан хабарим йўқ эди, лекин қизиқиши бор эди. Менинг битта ўғлим бор, ўқимишли бўлишини хоҳлайман. Инглиз тили, математика фанларига тўгаракка қўйиб ўтирибман. Ўзидан катта болаларга қизиқиб, шу қизиқиши туфайли машина ҳайдашга ўтиб олган. Бундан кейин тарбиясига мен ўзим жавобгарликни оламан”, — деди у.
Онаси бундан кейин фарзандининг тарбиясига кўпроқ эътибор қаратишини билдирган.
Ўқувчининг ўзи ҳам қилган ишидан афсусдалигини айтиб, бундай ҳолатни бошқа такрорламасликка ваъда берган.
“Мен Spark машинасини ҳайдаганман. Бундан афсусланаман. Қайтиб бу ишни қилмайман. Қоидаларни билмас эканман”, — деди у.
Шунингдек, ўқувчи тенгдошларини ҳам бундай ҳаракатлардан тийилишга чақирган.
