Ижтимоий тармоқларда Қозоғистон Республикасининг Олмаота шаҳридаги қурилиш объектларидан бирига ишлаш учун борган бир гуруҳ ўзбекистонлик меҳнат мигрантларининг ваъда қилинган ойлик маошлари берилмаётгани ҳақида мурожаати тарқалди.
Ташқи меҳнат миграцияси агентлиги ҳолатни ўрганди.
Маълум бўлишича, мазкур фуқаролар 2021 йилнинг май-июнь ойларида “Mutqin Amal Construction” қурилиш компанияси таклифи билан Қозоғистон Республикасининг Олмаота шаҳрига вақтинчалик меҳнат фаолиятини амалга ошириш мақсадида келган.
Бугунги кунга қадар Олмаота шаҳри Наурызбай туманидаги қурилиш объектларида (President's Park) меҳнат қилган. Компания вакиллари билан суҳбат ўтказилганда, ушбу фуқаролардан 40 нафари сентябрь ойида 12-15 кунлик иш ҳақидан ташқари иш ҳақини олиб, Ўзбекистонга қайтиб келган.
Қолган 18 нафари ўз хоҳишига кўра, меҳнат фаолиятини давом эттириш учун компания ихтиёрида қолган ва уларнинг иш ҳақи тўлиқ берилган.
Айни пайтда мазкур компанияда 200 дан ортиқ Ўзбекистон фуқаролари вақтинчалик меҳнат фаолиятини амалга оширмоқда.
