1

“Халқаро медиа-холл” тантанали тарзда очилди

СИЁСАТ 14.10.2021, 19:33
“Халқаро медиа-холл” тантанали тарзда очилди

Ўзбекистон Электрон оммавий ахборот воситалари миллий ассоциацияси (ЎзЭОАВМА) ташаббуси билан пойтахтимиздаги “Ёшлар ижод саройида 2021 йилнинг 24 октябрида бўлиб ўтадиган сайлов жараёнларини ёритишга кўмаклашиш мақсадида “Халқаро медиа-холл” ташкил этилди.

14 октябрь куни соат 17.00 да “Халқаро медиа-холл”нинг очилиш маросими бўлиб ўтди. Тадбирда Олий Мажлис Қонунчилик палатаси депутатлари  ва сенаторлар, вазирлик ва идоралар, сиёсий партиялар, дипломатик корпус, халқаро кузатувчилар маҳаллий ва хорижий оммавий ахборот воситалари  вакиллари, блогерлар, фаол ёшлар иштирок этди.

Тадбирда Ўзбекистон Республикаси Олий Мажлиси Сенати раисининг  биринчи ўринбосари Содиқ Сафоев,     Олий Мажлис Қонунчилик палатаси спикери ўринбосари Акмал Саидов,    Марказий Сайлов комиссияси раиси Зайниддин Низомходжаев “Юксалиш” Умуммиллий ҳаракати раҳбари Бобур Бекмуродов, Ўзбекистон Ёшлар Иттифоқи марказий кенгаши раиси ўринбосари Шерзод Олимов ва бошқалар сўзга чиқишди.

ЎзЭОАВМА бошқаруви раиси Фирдавс Абдухолиқов Президент сайловини кенг ва холисона ёритишда, сайловнинг халқаро андозаларга ва демократик тамойилларга мувофиқ тарзда ўтказилишида, оммавий ахборот воситалари учун транспарентлик ва тенг ҳуқуқлиликни таъминлашда  ушбу “Медиа-холл”нинг ташкил этилиши катта ёрдам беришини алоҳида таъкидлади.

“Мазкур медиа-холлни ташкил қилишдан асосий мақсад ҳам сайлов жараёнлари ҳақида халқимиз ва дунё ҳамжамиятини  мунтазам равишда, тезкор ва холисона хабардор қилиб боришдан иборат, – деди Ф.Абдухолиқов. – Медиа-холда маҳаллий  ва халқаро оммавий  ахборот воситалари  учун турли брифинглар, матбуот анжуманлари ўтказиш, сиёсий партиялар, давлат ва жамоат ташкилотлари, халқаро кузатувчилар билан учрашувлар ташкил қилиш, интервьюлар олиш, турли кўрсатувлар, медиамаҳсулотлар суратга олиш учун  барча шароитлар яратилган”.

Медиа холлнинг мақсад ва вазифалари, унда яратилган шароитлар ва яратилган имкониятлар тақдимоти ўтказилди.

 Шундан сўнг мамлакатимиздаги сиёсий партиялар вакиллари сўзга чиқиб,  ташвиқот жараёнлари ва медиа холлда яратилган шароитлар хусусида сўз юритишди.

 

Бу ерда мамлакатимиздаги сиёсий партияларнинг дастурлари тақдимоти, тегишли вазирлик ва идоралар, экспертлар иштирокида юртимизда сўнгги йилларда иқтисодий, ижтимоий-сиёсий, маданий-маърифий соҳаларда амалга оширилган ишлар бўйича мулоқотлар, долзарб мавзудаги баҳс-мунозаралар, ёш журналистлар ва блогерлар иштирокидаги турли брифинглар, маҳорат дарслари, қизиқарли танловлар, жами 40 дан ортиқ тадбирлар  ўтказилиши кўзда тутилган.

“Халқаро медиа-холл” тадбирларида  5000 нафардан ортиқ иқтидорли, фаол ёшлар, ижодкор талабалар, ёш мутахассислар иштирок этиши кутилмоқда. Шунингдек, “халқаро медиа-холл” кун тартибидан   концертлар, фильм тақдимотлари, қатор маданий дастурлар   ҳам ўрин олган.

 “Халқаро медиа-холл” 2021 йилнинг 26 октябрига қадар ўз фаолиятини давом эттиради.

Шарҳлар

Об-ҳаво: Тошкент
Валюта курси
1