Кеча хабар берганимиздек, “Халқаро медиа-холл” тантанали тарзда очилди.
Тадбир давомида сўзга чиққан Олий Мажлис Қонунчилик палатаси спикери биринчи ўринбосари Акмал Саидов Халқаро медиа-холл доимий фаолият кўрсатадиган Янги Ўзбекистоннинг эркин матбуот саройи бўлиб қолишини таъкидлади.
Авваламбор, барчангизни мана шундай Янги Ўзбекистоннинг эркин матбуотлар саройи ёки кошонаси ташкил қилингани билан табриклайман. Шундай халқаро медиа-холлни ташкил қилган ташкилотчиларга, Ўзбекистон электрон оммавий ахборот воситалари миллий ассоциациясига самимий миннатдорчилик билдирмоқчиман. “Мозийга қайтиб, иш тутмоқ хайрлидир” деган Абдулла Қодирийнинг гапини эслаб, олдинги сайловга қиёсладик. 2016 йилги президент сайловида халқаро пресс клубнинг дебочаси “Интерcонтинентал” меҳмонхонасида ташкил этилган эди. Бу жуда катта воқеа бўлганди. Халқаро медиа-холлнинг ташкил этилиши янги президентлик сайловидаги янги воқелик бўлди деб биламан. Уни ташкил этишдан мақсад нима десак, мен иккита нарсага эътибор қаратган бўлар эдим. Биринчиси, ҳозирги кунда очиқ, эркин ва баҳс-мунозаралар асосида ўтаётган Президент сайлови, унинг ўтказилиши, якунлари тўғрисида, авваламбор мамлакатимиз аҳолисини тезлик билан таништиришдан, хабардор қилишдан иборат. Иккинчиси, нафақат мамлакатимиз аҳолиси, дунё ҳамжамияти, дипломатик корпуслар, балки бизни кўпгина дунёдаги халқлар, халқаро ташкилотлар олдида ҳам сайловни очиқ демократик тарзда ўтаётганини кўрсатиш мана шу халқаро медиа-холлнинг муҳим вазифаси ёки мақсади деб биламан. Бу ерда шундай катта тадбирларни ёритиш учун жуда катта замин яратилибди. Мен хоҳлардимки, халқаро медиа холл доимий фаолият кўрсатадиган Янги Ўзбекистоннинг эркин матбуот саройи бўлиб қолсин.
