Бундан бир муддат аввал дзюдо бўйича Ўзбекистон терма жамоаси ҳарбийлар ўртасидаги Жаҳон чемпионатида иштирок этиш учун Франция пойтахти Париж шаҳрига жўнаб кетишганди.
Шу кунларда жаҳоннинг энг кучли ҳарбий дзюдочилари чемпионлик учун кураш олиб боришмоқда. Кеча старт олган мусобақанинг дастлабки кунидаёқ икки нафар ўзбекистоник жаҳонда тенгсиз эканлигини исботлади.
Хусусан, -52 кг вазн тоифасида Ўзбекистон шарафини ҳимоя қилган кадетлар ўртасида жаҳон чемпиони Диёра Келдиёрова энди ҳарбийлар ўртасида ҳам жаҳон чемпионига айланди.
Туризм ва спорт вазирлигининг қайд этишича, у тўғридан-тўғри ярим финалдан баҳсларига қўшилган. Бу босқичда франциялик Чеэнне Муниерни, финалда эса яна бир мезбонлар вакиласи Жулие Вейлл Дит Морейни мағлубиятга учратган.
Эркаклар ўртасидаги мусобақанинг -60 кг вазн тоифасидаги беллашувларида татамига чиққан Дилшодбек Баратов эса австриялик Даниел Леутгеб, эронлик Муҳаммад Ҳосейн, финалда эса франциялик Жолан Флоримонтдан устун келиб шоҳсупанинг энг юқори поғонасига кўтарилган.
Эслатиб ўтамиз, 40-маротаба ташкил этилаётган мазкур мусобақа 4 ноябргача давом этади.
