Жорий йилнинг 29 октябрь куни Коррупцияга қарши курашиш агентлиги ва “Минтақавий мулоқот” халқаро нодавлат ташкилоти вакиллари ўртасида учрашув ўтказилди.
Учрашув давомида ўзаро ҳамкорлик доирасида бир қатор янги лойиҳаларни амалга ошириш масалалари муҳокама этилган. Бу ҳақда агентлик хабар бермоқда.
Хусусан, қуйидаги қатор масалалар:
- “Минтақавий мулоқот” ва АҚШнинг Наркотик моддалар халқаро айланмасига қарши кураш ва ҳуқуқни муҳофаза қилиш фаолияти Бюроси кўмагида Американинг бир қатор ташкилот ва идоралари (АҚШ Федерал суд маркази, Этика бюроси, Федерал қидирув бюроси, Федерал савдо маркази) билан ҳамкорлик алоқаларини ўрнатиш;
- Коррупцияга қарши курашиш соҳасида сунъий интеллект имкониятларидан кенг фойдаланишни йўлга қўйиш учун халқаро экспертни жалб этиш;
- Ҳамкорликда қўшма тадқиқотларни ўтказиш кабилар муҳокама қилинган.
Бундан ташқари, Ўзбекистонда коррупцияга қарши курашиш соҳасида амалга оширилаётган ислоҳотлар кўлами бўйича Марказий Осиёда етакчилик қилаётганини инобатга олиб, шунингдек, давлат хизматчиларининг бу борадаги малакасини мунтазам равишда ошириб бориш тизимини йўлга қўйиш мақсадида Коррупцияга қарши курашиш Минтақавий ўқув марказини ташкил этиш истиқболлари бўйича фикр алмашилган.
Қайд этилишича, учрашувда томонлар келгусидаги ҳамкорлик йўналишларини кенгайтириш ва алоқаларни янада мустаҳкамлаш, илгари сурилган лойиҳаларни ишчи тартибда кўриб чиқишни давом эттиришга келишиб олишган.
