Тожикистон Республикасининг Душанбе шаҳрида Ўзбекистон Республикаси Кинематография агентлиги ҳамда “Тожикфильм” давлат муассасаси масъул ходимлари иштирокида “Абдураҳмон Жомий ва Алишер Навоий” тарихий-бадиий фильмини суратга олиш бўйича қўшма комиссиянинг навбатдаги йиғилиши бўлди.
Аввал хабар қилинганидек, Ўзбекистон Республикаси Президенти Шавкат Мирзиёевнинг 2021 йил 10-11 июнь кунлари Тожикистон Республикасига ташрифи давомида мамлакатимиз раҳбари томонидан икки давлат киноижодкорлари ҳамкорлигида Абдураҳмон Жомий ва Алишер Навоий ҳаёти ва ижоди ҳақида тарихий-бадиий фильм яратиш тавсия этилган ва бу таклиф Тожикистон Президеноти Эмомали Раҳмон томонидан қўллаб-қувватланган эди.
Айни пайтда ушбу фильмни яратиш бўйича ишчи гуруҳ ташкил қилинган. Мазкур ишчи гуруҳ аъзолари томонидан доимий учрашув ва мулоқотлар йўлга қўйилган. Сентябрь ойида 2021 йилнинг 10-15 сентябрь кунлари Тожикистон Республикаси киноижодкорлари ва олимларидан иборат делегация аъзолари Тошкент ва Самарқанд шаҳарларида кинолойиҳа концепцияси бўйича музокаралар олиб боришди.
Ўзбекистон Республикаси Кинематография агентлиги ва Тожикистон Республикасининг “Тожикфильм” давлат муассасаси раҳбарлари ўртасида “Ипак йўли дурдонаси” XIII Тошкент Халқаро кинофестивали доирасида “Абдурраҳмон Жомий ва Алишер Навоий” бадиий фильмини суратга олиш бўйича меморандум имзоланган эди.
Навбатдаги мажлисда Ўзбекистон Республикаси Кинематография агентлиги Бадиий кенгаши аъзоси, навоийшунос олим Рустам Жабборов, “Тожикфильм” давлат муассасаси раиси Маҳмасаид Шоҳиён, раис ўринбосари Толиб Ғайбуллозода, Тожикистон Фанлар академияси кутубхонаси директори Шодимуҳаммад Суфизода, Тожикистон Давлат санъат ва маданият институти ректори Муҳриддин Низомий, Тожикистон Миллий университети мумтоз адабиёт кафедраси профессори Бадриддин Мақсудов, Тожикистон Кино арбоблари уюшмаси раиси, сценарист Сафар Ҳақдодов ва бошқалар иштирок этди.
Йиғилишда М.Шоҳиён “Ипак йўли дурдонаси” Тошкент Халқаро кинофестивалидаги илиқ таассуротлар ҳақида гапириб, Тожикистон делегациясига кўрсатилган алоҳида ҳурмат ва эътибор учун Ўзбекистон ҳукуматига ва Ўзбекистон Республикаси Кинематография агентлигига миннатдорлик билдирди. Шундан сўнг йиғилиш иштирокчилари мазкур кинолойиҳанинг аҳамияти хусусида тўхталиб ўтишди.
Учрашув давомида ҳар икки мамлакат киноижодкорлари томонидан таклиф қилинган дастлабки сценарий лойиҳалари муҳокама қилинди. Ҳар икки томондан тавсия этилган муаллифлар томонидан буюк мутафаккирлар сиймосини ҳаққоний очиб бера оладиган, шу билан икки халқ дўстлишгини тараннум қиладиган киноасар яратиш лозимлиги таъкидланди.
Учрашув доирасида фильмнинг Тожикистон ҳудудида суратга олиниши мумкин бўлган тарихий обидалар ва локацияларга саёҳатлар уюштирилди.
