Кинематография агентлиги Қозоғистон маданият ва спорт вазирлиги билан меморандум имзолади

МАДАНИЯТ 06.12.2021, 18:53
Кинематография агентлиги Қозоғистон маданият ва спорт вазирлиги билан меморандум имзолади

Ўзбекистон Кинематография агентлиги билан Қозоғистон маданият ва спорт вазирлиги ўртасида кинематография соҳасидаги ҳамкорлик тўғрисидаги меморандум имзоланди, дея хабар бермоқда Кинематография агентлиги ахборот хизмати.

Мазкур меморандум 6-8 декабрь кунлари Қозоғистонда бўлиб ўтаётган “Ўзбек кино кунлари” доирасида имзоланди.

Унга кўра, ўзбек ва қозоқ киноижодкорлари ўртасида ҳамкорликда “Қўшнилар” (“Соседи”) ҳамда  “Эшелонлар Шарққа кетади” («Эшелоны идут на Восток») каби янги кинолойиҳаларнинг суратга олиниши юзасидан муҳокама бўлиб ўтди. Маълумки, жорий йилда ўзбек ва қозоқ ижодкорлари ҳамкорликда “Мерос” бадиий фильми ва “Абай сўзи” ҳужжатли картиналари суратга олинган эди.

Эндиликда икки давлат ўртасида яна янги кинолойиҳалар ишга туширилади. Шунингдек, таълим, киносаноатни янада ривожлантириш, кадрлар алмашинуви, кинопродюсерликни ривожлантириш бўйича ишлар амалга оширилади.

Эслатиб ўтамиз, Қозоғистонда бўлиб ўтаётган “Ўзбек кино кунлари” доирасида янги фильмлар премьералари, ижодкорлар давра суҳбатлари, киноижодкорлар билан маҳорат дарслари, анимацион ва ҳужжатли фильмлар намойишлари ўтказилади.

Шунингдек, икки давлат телеканалларида ўзбек ва қозоқ миллий фильмларининг намойишлари бўлиб ўтади.

Шарҳлар

Об-ҳаво: Тошкент
Валюта курси
1