Кеча Кинематография агентлиги ташаббуси билан Қозоғистонда “Ўзбек кино кунлари” бошланди. Унда таниқли киноижодкорлардан иборат ўзбек делегацияси ҳам иштирок этмоқда. Мазкур "Ўзбек кино кунлари" 8 декабрга қадар давом этади. Бу ҳақда Кинематография агентлиги Ахборот хизмати хабар берди.
Кун давомида Ўзбекистон Кинематография агентлиги билан Қозоғистон маданият ва спорт вазирлиги ўртасида кинематография соҳасидаги ҳамкорлик тўғрисидаги меморандум имзоланди. Унга кўра, ўзбек ва қозоқ киноижодкорлари ўртасида ҳамкорликда “Қўшнилар” (“Соседи”) ҳамда “Эшелонлар Шарққа кетади” («Эшелоны идут на Восток») каби янги кинолойиҳаларнинг суратга олиниши юзасидан муҳокамаси бўлиб ўтди.
Кечки дастурда Қуанишбаева номидаги қозоқ давлат академик мусиқа драма театрида “Ўзбек кино кунлари”нинг ижодий кечаси бўлиб ўтди. Кечада Кинематография агентлиги Бош директори Фирдавс Абдухолиқов сўзга чиқди.
Сўнг, ўзбек ва қозоқ ижодкорлари томонидан шоу-концерт тақдим этилди.
Ўзбек делегациясида Агентлик бош директори Фирдавс Абдухолиқов бошчилигида режиссёр Ҳилол Насимов, актёрлар Карим Мирҳодиев, Фотиҳ Насимов, актрисалар Гавҳар Зокирова, Айсанем Юсупова, кулги устаси Болтавой Тошматов, эстрада хонандаси Райҳон Ғаниева ва бошқалар иштирок этишмоқда.
Шунингдек, қозоқ телеканалларида “Мерос”, “Ибрат”, “Тутқунлик” каби ўзбек фильмларининг ҳамда ўзбек телеканалларида "Небо моего детства", "Ореховое детство", "Каникулы оффлайн", "Жау журек мын бала" каби қозоқ миллий фильмларининг телевизион намойишлари бўлиб ўтади.
