Аввал хабар қилинганидек, Санкт-Петербургда мутафаккир Алишер Навоий таваллудининг 580 йиллигига бағишланган тадбирлар давом этмоқда.
Бугун Россия Фанлар академияси Шарқ қўлёзмалари институтида Алишер Навоий хаёти ва ижодига бағишланган анжуман ўтказилди.
Унда Ўзбекистон маданий меросини асраш ўрганиш ва оммалаштириш бўйича Бутужахон жамияти бошқаруви раиси Фирдавс Абдухолиқов, Ўзбекистон Қахрамони, олим ва таржимон Иброҳим Ғафуров, навоийшунос олимлардан Шуҳрат Сирожиддинов, Афтондил Эркинов, Султонмурод Олим, Олимжон Давлат, Буробия Ражабова, Россия Фанлар академияси Шарқ қўлёзмалари институти директори Ирина Попова ва бошқалар Навоий меросининг бугунги кундаги аҳамияти, унинг инсонпарварлик ғоялар, навоийшунослар жасорати хусусида сўз юритишди.
ФА Шарқ қўлёзмалари институтида Алишер Навоийнинг ўнга яқин нодир қўлёзмалари сақланади.Ўзбекистонлик олимлар институтдаги қатор нодир манбалар билан танишишди.
Эслатиб ўтамиз, 1941 йилнинг 10 декабрь куни Иккинчи жаҳон урушининг энг мудҳиш дамларида, Ленинград (хозирги Санкт-Петербург) даҳшатли қамал исканжасида қолган пайтларда Давлат Эрмитажида Алишер Навоий таваллудининг 500 йиллиги муносабати билан илмий-анжуман ўтказилган.
Ўзбекистон маданий меросини асраш, ўрганиш ва оммалаштириш бўйича Бутужахон жамияти ташаббуси билан Россия Давлат Эрмитажи раҳбариятига ҳазрат Навоийнинг 580 йиллиги ҳамда қамал даврида ўтказилган адабий анжуманга 80 йил тўлиши муносабати билан ушбу нуфузли маданият масканида илмий-бадиий кеча ўтказиш режалаштирилган.
