2021 йилнинг ўтган 6 ойида прокуратура органлари томонидан 140 мингдан ортиқ фуқаронинг мурожаати ҳал этилиб, 23 мингга яқин шахснинг бузилган ҳуқуқлари тикланди. Бу ҳақда Ўзбекистон Республикаси прокуратура органлари ташкил этилганлигининг 30 йиллигига бағишлаб ўтказилган “Ўзбекистон прокуратураси: кеча, бугун ва эртага” мавзусида халқаро илмий-амалий конференциясида маълум қилинди.
Конференцияда Бош прокурор Н.Йўлдошев, Олий Мажлиси Сенати Раисининг биринчи ўринбосари С.Сафоев, Инсон ҳуқуқлари бўйича миллий марказ директори А.Саидов, Халқаро прокурорлар ассоциацияси Президенти Чхоль-Кю Хван, МДҲ давлатларининг Бош прокурорлари Мувофиқлаштирувчи кенгаши Ижрочи котиби В.Зимин, Олий суд раиси К.Камилов, Адлия вазири Р.Давлетовлар сўзга чиқишди.
Адлия вазири сўнгги йилларда Ўзбекистонда прокуратура органлари фаолиятининг тубдан ўзгаргани ҳақида аниқ маълумотларни келтирди.
"Хусусан, охирги уч йилда прокуратура органлари томонидан қонунийликни таъминлаш мақсадида жами 540 мингдан ортиқ прокурор ҳужжатлари қўлланилган. Бу бир оддий рақамдек кўриниши мумкин, лекин бу рақамлар ортида катта меҳнат ётганлигини фаҳмлаш қийин эмас.
Шунингдек, сўнгги 5 йилда коррупцион қилмишни содир этиб, жиноий жавобгарликка тортилган мансабдор шахслар сони 14 мингдан ошган, яъни, мана шу коррупцион ҳолатларни фош қилган прокуратура органлари ҳисобланади. Республика даражасида таҳлил қилдадиган бўлсак, шундан 160 нафардан ортиғи республика миқёсидаги, 1 минг 270 нафардан ортиғи вилоят миқёсидаги ҳамда 13 минг нафардан ортиғи туман миқёсидаги мансабдор шахслар эканлиги прокуратура органларининг коррупцияга муросасизлик борасидаги фаолият кўлами қай даражада эканлигини кўрсатади", - дея таъкидлади Адлия вазири.
Бундан ташқари, тадбирда Европа прокурорлари маслаҳат кенгаши Президенти, Испания Бош прокурорининг атроф-муҳит ва ер бошқаруви бўйича ўринбосари А.Ногуэра, Озарбайжон Республикаси Бош прокурори ўринбосари Э.Джамалов, Қирғизистон Республикаси Бош прокурори ўринбосари К.Токтакуновлар прокуратуранинг ташкилий-ҳуқуқий ва институционал асослари, фаолиятни ташкил қилиш ва амалга оширишнинг долзарб масалалари борасидаги тажриба билан ўртоқлашилди.
Тадбир давомида шунингдек “Прокуратура органларининг фуқаролар ҳуқуқ ва эркинликлари, давлат ва жамият манфаатлари ҳимоясини таъминлашдаги роли” ҳамда “Прокуратура органларининг жиноятчиликка қарши курашиш фаолиятидаги ўрни” мавзуларида параллел сессиялар бўлиб ўтди, унда хорижий давлатларнинг прокуратура органлари, ўқув ва илмий-тадқиқот муассасалари вакиллари, шунингдек миллий мутахассислар ҳамда экспертлар маъруза қилишди.
Шу билан бирга, конференцияга тадқиқот ишларини олиб бораётган олимлар, тадқиқотчи ва амалиётчи ходимлар ҳам кенг жалб қилиниб, прокуратура органлари фаолиятини такомиллаштириш, шу жумладан “Прокуратура тўғрисида”ги қонуннинг янги таҳририни ишлаб чиқишда илғор ҳорижий тажрибани ҳамда халқаро мутахассисларнинг тавсияларини ўрганиб чиқиш белгиланди.
Фарида Эгамбердиева
