Бельгия ҳукумати келаси ҳафтадан бошлаб коронавирусга қарши кураш чораларини юмшатади. Бу ҳақда Associated Press хабар бермоқда.
Маълум қилинишича, ҳукумат чиқарадиган янги қарорга кўра, ресторан ва барлар чекловсиз ишлашига рухсат берилади.
"Биз баъзи чораларни юмшатишни бошлашимиз мумкин. Барлар ва ресторанларнинг ишлаш вақтига тўсиқ бўлмаймиз. Шунингдек, бир столда неча киши ўтириб суҳбатлашишига ҳам чеклоқ қўйилмайди", дея баёнот берди Бельгия Бош вазири Александр Де Крос.
Эндиликда Бельгияда бар ва ресторанларда ниқоб тақмаслик, тунги клублар ҳамда рақс майдончалари қайта очилиши мумкин. Очиқ ҳаводаги тадбирлар, шу жумладан концертлар чекловларсиз ўтказилиши мумкин бўлади.
Маълумот учун, Бельгияда пандемиянинг бутун даврида 3,4 миллиондан ортиқ коронавирус инфекцияси аниқланган. Ушбу касаллик оқибатида эса 29,5 мингга яқин ўлим ҳолатлари қайд этилди.
