Орамизда ғаройиб қобилиятли одамлар учраб туради. Сочи билан поездни ҳаракатлантирган, ўз вазнидан бир неча баробар узоққа сакрайдиган, тонналаб машиналарни кўтарадиган ва ҳатто ўргимчак каби деворларга тирмашиб, бемалол юрадиганлар ҳақида кўп маротаба эшитганмиз. Бугунги қаҳрамонимиз ҳам хотираси ёрдамида кубик-рубикдан яратаётган санъати билан кўпчиликни ҳайратга солмоқда. Унинг қилаётган ижоди бугун ижтимоий тармоқларда кенг муҳокамалар марказида. 600 та кубик-рубикдан ҳар хил машҳур инсонларнинг портретларини ва турли давлатларнинг байроқларини ясаган.
МАЪЛУМОТ УЧУН:
Аброржон Азимжонов 2003 йилда Наманган вилоятининг Тўрақўрғон туманида туғилган.
Ҳозирда “Tashkent university of economics and management” нинг 1 босқичталабаси.
Аълочи, тиришқоқ ва интилувчан ёшлардан ҳисобланади. Унинг ўзига хос томони хотираси бошқа одамларникига ўхшамайди. Яъни қаҳрамонимиз ҳар қандай маълумотни хотирасида тез ва аниқ сақлаб қола олади.
Мнемоника бўйича Ўзбекистон чемпиони ҳамда хотирани ривожлантириш бўйича тренер.
— Супер хотирага эга бўлиш учун нима қилиш керак?
— Супер хотирага эга бўлиш бу ҳеч ҳам суперталант эмас. Ҳар хил услуб ва машғулотлар орқали бунга эришса бўлади. Олдин мактабда менда бир нечта фанлардан муаммо бўлар эди. Хотирам яхши эмасди. Курсларга чиқиб, ўрганиб хотирамни ривожлантириб шу даражага эришдим. Ёмон хотира бўлмайди, шуғулланган хотира ва шуғулланмаган хотира бўлади. Сиздан шуғулланиш талаб этилади, холос. Хотирани кучайтириш ҳар бир инсоннинг ўз қўлида. Уни фақат кўпчилик ишлата олмайди.
— Кучли хотира сизга ҳаётда асқотган вақтлари бўлганми?
— Албатта-да! Бир куни таксига чиқдим ва у таксида буюмим қолиб кетди. Таксига чиқишдан олдин мен такси рақамини, ранги ва русумини эслаб қолган эдим. Шу номер орқали ўша таксини топиб, буюмимни зудлик билан олганман. Шундан кейин амин бўлдимки, эътиборли бўлишдан ташқари кучли хотирага эга бўлиш ҳам муҳим.
— Илк марта кубик-рубикни қўлингизга олишингизга нима туртки бўлган?
— Бир куни интернетда видео кўриб қолдим. Унда америкалик блогерлар кубик-рубикдан инсонларни портретини тераётганди. Ўзим ҳам нега ўзбек фарзанди қилолмаскан, дея бу ишни ўргана бошладим.
— Биринчи ясаган портретингиз...
— Биринчи бўлиб Ўзбекистон Республикасининг биринчи президенти Ислом Каримовнинг портретини тердим ва биринчи видеом ҳам шу бўлди. Шундан кейин кўпчиликда бу видеоконтент қизиқиш уйғотди. Кейинчалик эса ўзим ёқтирган сиёсатчилар портретини ҳам тердим.
— Ютуқларингиз ҳақида айтиб ўтсангиз...
— Россиядаги “Удивительные люди” шоусида қатнашиб, ўз иқтидоримни намойиш қилиш имкониятини қўлга киритдим. Ўзбекистонда биринчи бор ўтказилган хотира чемпионатида қатнашиб, чемпион бўлдим. Дзюдо спорт тури билан ҳам 7 йилдан бери шуғулланиб келаман ва кўплаб натижаларим бор.
— Бугунги кунда буюртмалар тушяптими?
— Албатта, ижтимоий тармоқларда видеоларни жойлаганимдан кейин жуда кўп инсонлар ёзиб бошлашди. Онажонимни, турмуш ўртоғимни, акажонимни ва бошқаларни портретларини қилиб беринг, деб. Яширмайман, албатта, бундан маблағ келиб туради. Ушбу топган маблағларим ўзимнинг харажатларимга бемалол етади.
— Келажакда қайси касбнинг этагини тутмоқчисиз?
— Бизнес, маркетинг соҳасига жуда ҳам қизиқишим баланд. Келажакда кучли маркетолог бўлмоқчиман.
Аброр 2 йил ичида 50 дан ортиқ шу каби портретларни ясаб улгурган ва кубик-рубикдан портрет ясашни ўзининг ҳоббиси, деб қарайди. Аммо у иқтидори орқали ўзининг эҳтиёжлари учун етарли пул ҳам топади.
Мафтуна ЖЎРАЕВА
