Тошкентда крипто-активлар айланмаси билан лицензиясиз шуғулланган талаба аниқланди. У 10 ой давомида 64,7 минг USDT миқдоридаги крипто-активларни олди-сотди қилган.
Давлат хавфсизлик хизмати ходимлари Тошкент шаҳар Ички ишлар бош бошқармаси билан ҳамкорликда ўтказган тезкор-қидирув тадбирлари давомида қонунбузарлик ҳолатини аниқлади.
Маълум қилинишича, Тошкент туманида яшовчи, 2008 йилда туғилган фуқаро пойтахтдаги давлат олий таълим муассасаларидан бирида таҳсил олади. У 2025 йил декабридан 2026 йил октябрига қадар «Bitget» крипто-биржаси орқали лицензиясиз фаолият юритиб, жами 64 715 USDT миқдоридаги крипто-активларни олди-сотди қилган.
Шунингдек, у Telegram мессенжери орқали 140 та хорижий давлатнинг виртуал телефон рақамларини сотиш билан ҳам шуғулланган.
Тезкор тадбирлар давомида унинг крипто-ҳамёнида 450 USDT мавжудлиги ҳам аниқланган.
Ҳозирда мазкур ҳолат юзасидан жиноят иши қўзғатилган. Тергов ҳаракатлари олиб борилмоқда.
