Туркия Президенти Ражаб Тойип Эрдўған Путин ва Зеленский учрашувини ташкиллаштирмоқчи. У Украина президенти бунга рози бўлганини маълум қилган. Бу ҳақда Замон хабар берди.
Хабарга кўра, Эрдўған бу ҳақда БААдан қайтишида, журналистлар билан суҳбатида маълум қилган:
"Жаноб Зеленский билан кўришганимизда у Путин-Зеленский-Эрдўған форматидаги уч томонлама учрашувга ижобий қарашини билдирди. Агар жаноб Путин ҳам бунга розилик билдирса, биз Истанбул ёки Анқарада учрашишимиз мумкин. Ҳозир эса мен телефон дипломатияси орқали унинг бу бўйича муносабатини билмоқчиман", — деган Эрдўған.
Туркия президенти сўзларига кўра, минтақадаги уруш — бу салбий белги.
"Бу минтақа барқарорлиги учун зарарли. Биз Путин билан ҳам, Зеленский билан ҳам доимий алоқадамиз. Фикримча, кескинликни юмшатиш учун бу жиддий имконият", – деб қайд этган сиёсатчи.
