Украина атрофидаги инқироз Европа дипломатлари Брюсселдаги учрашувининг асосий мавзуси бўлди. Бу ҳақда Euronews ёзмоқда.
Қайд этилишича, Европа Иттифоқига аъзо давлатларнинг ташқи ишлар вазирлари можарони юмшатиш учун қўлдан келган барча ишни қилишга, аниқ келишувга эришиш тинимсиз музокаралар ўтказишга тайёр эканликларини билдиришган. Учрашувда Россияга қарши санкциялар муҳокама қилинмаган.
Европа Иттифоқининг ташқи ишлар ва хавфсизлик сиёсати бўйича Олий вакили Жозеп Боррель қуйидаги изоҳни берди:
"Агар вақти келса, мен Европа Кенгашининг навбатдан ташқари йиғилишини чақираман, чунки санкциялар унинг ваколатидир. Менинг илтимосим бўйича, кенгаш қарор қилади. Агар вақти келса, бундай қадамга тайёрмиз, лекин биз бу содир бўлмаслигига ишонч ҳосил қилиш учун ҳаракат қиламиз",-дейди у.
Дания ташқи ишлар вазири Йеппе Кофод ҳам дипломатик йўл тутишни сўрамоқда:
"Биз бу жуда жиддий вазият эканлигини аниқ биламиз, лекин уруш бўлмайди деган умидда ишлаяпмиз. Ҳар қандай ҳолатга тайёр туришимиз керак, аслида. Энг ёмони, Путин бу дипломатияларга эътибор қилмай ҳаракат қилиши",-дейди Кофод.
