Сурхондарё вилояти Сариосиё туманидаги Алишер Навоий маҳалласида яшовчи фуқаролар Тўпаланг дарёси қирғоғидан жуда кўп мис тангалар топиб олгани ҳақида ОАВда маълумотлар тарқалди.
Вазирлар Маҳкамасининг Маданий мерос инспекцияси раҳбарлигида ҳамда Маданий мерос агентлиги вакилларидан тузилган ишчи гуруҳ Сариосиё туманида олиб борган ўрганишлари натижасида бу маълумот тасдиқланди. Бу ҳақда Маданий мерос агентлиги Ахборот хизмати маълум қилди.
Олимлар мазкур ашёлар ҳозиргача ватанимиз ҳудудидан топилган Мирзо Улуғбек ҳукмронлиги даврида зарб эттирилган пул тангаларининг энг катта ва яхши сақланган хазинаси эканлигини таъкидлашмоқда.
Шунингдек, Сариосиё туманидаги Алишер Навоий маҳалласида яшовчи фуқаролар томонидан топилмалар талон-тарож қилинаётганлиги аниқланди.
Айни пайтда Инспекция, Агентлик ҳамда ҳуқуқни муҳофаза қилувчи органлар томонидан топилмалар аниқланган ҳудуд муҳофазага олинган. 9-мартдан бошлаб, Сариосиё тумани Тўпаланг дарёси ҳудудида илмий изланишлар олиб борилади.
Таъкидлаш лозим, Ўзбекиcтон Республикасининг “Археология мероси объектларини муҳофаза қилиш ва улардан фойдаланиш тўғрисида”ги Қонуннинг 16-моддасига кўра Археология ашёларини давлатга топшириш ҳамда фан, маданият ва таълим муассасаларига бириктириб қўйиш, очиқ варақ ва рухсатнома олган археолог археология ашёлари давлатга топширилишига қадар уларнинг бут сақланишини таъминлаши лозимлиги белгиланган.
Фуқароларимиздан давлат мулкига эҳтиёткорона муносабатда бўлишларини ва топилмаларни ўрнатилган тартибда тегишли ташкилотларга топширишда фаолликларини сўраб қоламиз.
Шу ўринда давлатга топширилган хазина ва моддий бойликлар учун мукофот белгиланганлиги алоҳида таъкидланади.
