АҚШнинг собиқ президенти Барак Обама коронавирус инфекциясини юқтириб олган. Сиёсатчи ўзини яхши ҳис қилаётганини билдирган.
— Ҳозиргина коронавирусга топширган тестнинг ижобий натижасини олдим. Бир неча кундан бери томоғим тирналади. Шуни ҳисобга олмаганда, ўзимни яхши ҳис қиляпман, — деб ёзган Обама «Twitter»даги саҳифасида.
Айни пайтда унинг рафиқаси Мишель Обамада коронавирус аниқланмаган. Олдинроқ улар коронавирусга қарши қайта эмлангани маълум бўлган эди.
Эслатиб ўтамиз, Барак Обама 2009-2017 йилларда АҚШ президенти бўлган. 2009 йилда у Тинчлик бўйича Нобел мукофоти билан тақдирланган эди.
