Тожикистоннинг Душанбе шаҳрида ўтказилаётган велоспортнинг шоссе йўналиши бўйича Осиё чемпионати вакилларимиз учун муваффақиятли давом этмоқда. Бугун яна икки нафар ҳамюртимиз қитъа чемпионатининг олтин медалини қўлга киритишди.
Даставвал ҳамюртимиз София Каримова терма жамоамизга ушбу мусобақадаги ҳисоб бўйича тўртинчи олтин медални тақдим этди. У 61 км масофага ўтказилган гуруҳ пойгаларида марра чизиғини 1:36:45 соат ичида босиб ўтди ва Осиё чемпиони деган юксак шарафга сазовор бўлди.
Кейинги поғоналардан мос равишда қозоғистонлик спортчилар Алина Спирина ҳамда Даря Қозоқбойлар жой олишди.
Ушбу дистанцияда қатнашган қолган ҳамюрларимиз қуйидаги натижаларни қайд этишди:
- Анна Кускова – 1:40:39
- Севинч Юлдошева – 1:40:42
- Асал Ризаева – 1:40:46
Терма жамоамизга навбатдаги олтин медални Самандар Султонов қўшиб қўйди. Иқтидорли спортчимиз 111 км масофага ўтказилган гуруҳ пойгаларида ғолибликни қўлга киритди. У белгиланган масофани 2:47:13 соат ичида босиб ўтди. Бу кўрсаткич мусобақа иштирокчилари орасидаги энг яхши натижа сифатида қайд этилди.
Ҳамюртимиздан бироз ортда қолган қозоғистонлик Максим Тараскин 2-ўринни эгаллаган бўлса, унинг жамоадоши Иля Карабутов эса 2:56:50 натижа билан 3-поғонадан жой олди.
Ўзбекистонлик яна бир спортчи Диёр Тохиров совриндорлардан бироз ортда қолиб, 4-ўринни эгаллаган бўлса, яна икки вакилимиз Давиржон Абдураҳмонов ва Фаррух Бобошеров мос равишда 6 ва 7-поғоналарни банд этди.
